Օշինդրը՝ հակախոցային, հակամանրէային, հակաբորբոքային ազդեցությամբ

Օշինդրն ու նրանից ստացվող պատրաստուկներն օժտված են ախորժաբեր, ստամոքսի հյութազատությունը խթանող, լեղամուղ, ենթաստամոքսային գեղձի գործունեությունը խթանող, հակամանրէային, հակաբորբոքային, հակախոցային, հակաճիճվային ազդեցությամբ: Կիրառվում է անորեքսիայի՝ ախորժակի բացակայություն, մարսողական խանգարումների, հիպոացիդ գաստրիտների՝ ցածր թթվայնության ստամոքսաբորբ, լեղուղիների շարժողականության խանգարումների, լեղու կանգի ժամանակ:

Ստամոքս-աղիքային տրակտի գործունեության խանգարումների, լեղուղիների շարժողականության դեպքում խորհուրդ է տրվում 1 ճաշի գդալ մանրացված օշինդրին ավելացնել 2 բաժակ եռման ջուր, թրմել 30 րոպե, քամել: Ընդունել 1/4 բաժակ՝ օրը 3 անգամ՝ ուտելուց 30 րոպե առաջ:

Որպես հակաճիճվային միջոց կարելի է օգտագործել հետեւյալ պատրաստուկը. 1 թեյի գդալ մանրացված օշինդրին ավելացնել 2 բաժակ եռման ջուր, թրմել 20 րոպե, քամել: Ընդունել 3 ճաշի գդալ՝ առավոտյան սոված փորին եւ երեկոյան քնելուց առաջ, 10 օրվա ընթացքում:

Ենթաստամոքսային գեղձի գործունեության խանգարումների՝ հյութազատության նվազման, ֆերմենտների քանակի նվազման դեպքում 2 ճաշի գդալ օշինդրին ավելացնել 1 բաժակ եռման ջուր, տաքացնել ջրաբաղնիքի վրա 15 րոպե, սառեցնել սենյակային ջերմաստիճանում 45 րոպե, քամել: Ստացված ջրաթուրմի ծավալը եռման ջրով հասցնել սկզբնականին: Ընդունել 1/2 բաժակ՝ օրը 3 անգամ՝ ուտելուց 30 րոպե առաջ:

Որպես ախորժաբեր, ցածր թթվայնության գաստրիտների ժամանակ 10 գրամ օշինդրին ավելացնել 50 միլիլիտր սպիրտ՝ 70 տոկոսանոց, թրմել 2 շաբաթ մութ տեղում՝ պարբերաբար խառնելով, քամել: Ընդունել 15-20 կաթիլ, օրը 3 անգամ՝ ուտելուց 30 րոպե առաջ:

Պատրաստեց ԱՆՈՒՇ ՄԱԹԵՎՈՍՅԱՆԸ