Ինչպես տեղեկացրել ենք, նախագահի թեկնածու Արմեն Սարգսյանն այսօր հանդիպում է ունեցել «Ելք» խմբակցության անդամների հետ:
Հանդիպումից հետո լրագրողների հետ զրույցում խմբակցության ղեկավար Նիկոլ Փաշինյանն ասաց, թե ինչ թեմաների շուրջ են խոսել Սարգսյանի հետ: Փաշինյանն ասաց, որ Արմեն Սարգսյանին ասել են, որ Սերժ Սարգսյանը հավակնում է վարչապետի պաշտոնում եւ դա լուրջ հարց է, ՀՀ նախագահը, ով էլ լինի, լուրջ խաչմերուկի մեջ կարող է հայտնվել. «Հետաքրքրվել ենք, թե ինչպես է վերաբերվում, որ նախագահական նստավայրը պատրաստվում են խլել, ինչպես է վերաբերվում ներման համակարգի փոփոխությանը, քանի որ Սահմանադրությամբ հստակ նախագահին է վերապահվում, բայց օրենքը փոփոխում են այնպես, որ դե ֆակտո դառնում է վարչապետի գործառույթը: Ընտրակաշառքի խնդիրներով ենք հետաքրքրվել, Մարտի 1-ի մասին դիրքորոշումն ենք փորձել ճշտել, քաղբանտարկյալների հետ կապված հարց ենք բարձրացրել, նաեւ իր քաղաքացիության հետ կապված»:
Թե ինչ է իրենց ասել Արմեն Սարգսյանը, Փաշինյանը կոռեկտ չհամարեց իր խոսքերը հրապարակել: Հարցին՝գո՞հ եք հանդիպումից՝ նա պատասխանեց, որ իր պատասխաններն ընդունել են ի գիտություն, բայց իրենց քաղաքական դիրքորոշումներում փոփոխություն չկա:
Հարցին՝ իր մոտեցումներով Արմեն Սարգսյանը տարբերվո՞ւմ է գործող իշխանությունից, իշխող ՀՀԿ-ից, Սերժ Սարգսյանից եւ մյուսներից՝ Փաշինյանը պատասխանեց, որ «եթե Արմեն Սարգսյանը ՀՀԿ-ի թեկնածուն լինի, ինքը իշխանության թիմի մեջ է՝ սահմանադրական նոր գործառույթներով, որի վրա դրված է քաղաքական պարտավորություն լինել չեզոք եւ անաչառ: Արմեն Սարգսյանը, եթե համաձայնվի լինել նախագահի թեկնածու, նշանակում է համաձայնվում է լինել այդ դերակատարը»:
Կարո՞ղ է Արմեն Սարգսյանը հակակշռել իշխող ՀՀԿ-ին՝ Փաշինյանը պատասխանեց, որ դա նախագահի պարտականությունն է, թե ինչքանով կկատարվեն պարտականությունները, դրանից կբխի մարդկանց վերաբերմունքը՝ այդ գործունեության նկատմամբ:
Թե Արմեն Սարգսյանի մասին ի՞նչ կարծիք է կազմել՝ Նիկոլ Փաշինյանը պատասխանեց, որ իրենց կարծիքը չի փոխվել: Նա ասաց, որ իր քաղաքացիության հետ կապված հարցը կարելի է ճշտել, եթե այն, ինչ Արմեն Սարգսյանն ասում է, համապատասխանում է իրականությանը, ուրեմն Սահմանադրությունը չի խախտվել. «Եթե իր պարզաբանումները ճիշտ են, ուրեմն չի խախտվել»:
Մենք հետաքրքրվեցինք՝ դուք Արմեն Սարգսյանից ճշտե՞լ եք՝ ինքը պատրաստվո՞ւմ է նստել ձեր ասած «եվրոռեմոնտ կվարտիրայում եւ միայն ժպտալ»: Փաշինյանը պատասխանեց. «Առաջադրել ենք հենց կոնկրետ նստավայրի հետ կապված հարցը եւ օրենսդրական փոփոխության հետ կապված հարցը, ստացել ենք դրա հետ կապված պատասխաներ եւ այդ պատասխաններն ընդունել ենք ի գիտություն»:
Ժպտալ-չժպտալու վերաբերյալ նույնպես Արմեն Սարգսյանից պատասխան են ստացել, թե ինչ՝ Փաշինյանը չհստակեցրեց:
Հռիփսիմե ՋԵԲԵՋՅԱՆ
