ՀՀ ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի անդամներն այցելել են Շիրակի պետական համալսարան

Շիրակի Մ. Նալբանդյանի անվան պետական համալսարանի պրոֆեսորադասախոսական կազմի կողմից ՀՀ ԱԺ նախագահին եւ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովին հասցեագրված դիմումների հիման վրա մարտի 14-ին վերոնշյալ հանձնաժողովի նախագահ Վարդան Բոստանջյանը եւ հանձնաժողովի անդամներ Կարինե Աճեմյանը, Իվետա Տոնոյանը, Արման Սաղաթելյանը եւ Արարատ Միրզոյանն այցելել են համալսարան:

Այցի նպատակն էր անդրադառնալ պրոֆեսորադասախոսական կազմի շրջանում առաջացած մի շարք խնդիրների, քննարկել դրանց լուծման ուղիները:

Տեղեկացնենք, որ բուհի դասախոսներ Հովհաննես Խորիկյանը եւ Գագիկ Համբարյանը բազմիցս նամակով դիմել են Ազգային ժողով` հայտնելով իրենց մտահոգությունները Շիրակի պետական համալսարանում ստեղծված իրավիճակի, բուհի ռեկտոր Սահակ Մինասյանի, նրանց խոսքով, անօրինականությունների ու կամայականությունների վերաբերյալ:

Հանդիպմանը ներկա են եղել նաեւ համալսարանի պրոռեկտորներ Երվանդ Սերոբյանը եւ Անահիտ Ֆարմանյանը:

Քննարկվել են բուհի ղեկավարության գործունեությանն առնչվող մի շարք խնդիրներ, որոնք վերաբերել են մասնավորապես մագիստրատուրայի ընդունելության կարգի ձեւավորման, բուհի ֆինանսական գործունեության թափանցիկության, գրադարանային ֆոնդի նպատակային օգտագործման եւ այլ հարցերին:

Հանձնաժողովի նախագահ Վարդան Բոստանջյանն անհրաժեշտ է համարել կրթական հաստատությունում վստահության մթնոլորտի ամրապնդումը, խնդրահարույց հարցերի համատեղ քննարկումը` միտված համալսարանի գործունեության թափանցիկության ապահովմանը:

ՀՀ Ազգային ժողով