«Բուրգեր Քինգ» արագ սննդի օբյեկտում տեղի ունեցած պայթյունի հետեւանքով հիվանդանոց տեղափոխված 8 տուժածներից 2-ը դուրս են գրվել։ «Հայկական ժամանակ»-ն այս մասին տեղեկացավ «Սուրբ Գրիգոր Լուսավորիչ» բժշկական կենտրոնի տնօրենի տեղակալ Գագիկ Մանուկյանից։ Մանրամասնելով նա ավելացրեց, որ դուրս գրվողներն Իրանի երկու քաղաքացիներն են։ «Զեյնաբը գիշերն է դուրս գրվել, ինքնաթիռը գիշերն էր, եւ մյուսը Էրիկ անունով հայ տղա էր, դուրս է գրվել առավոտյան՝ լրիվ կայուն վիճակում»,- ասաց նա։
Դեռեւս բուժկենտրոնում գտնվող 6 տուժածներից 3-ը ՌԴ քաղաքացիներ են։ Նրանք հավանաբար դուրս կգրվեն այսօր։ «Իրենց կոնսուլը մեքենա կտրամադրի, մեր հիվանդանոցից անմիջապես կմեկնեն օդանավակայան, կթռչեն Մոսկվա։ Նրանց վիճակը բավարար է»,- շարունակեց Գագիկ Մանուկյանը։
Համեմատաբար երկարատեւ բուժօգնության կարիք ունեն տուժածներից երեքը։ Նրանցից մեկը «Բուրգեր քինգ»-ի մենեջերն է, մյուսները՝ քույր եւ եղբայր Ռուդոլֆն ու Ռուբինան։ 8-ամյա Ռուբինայի մասին դեռ առաջին օրն էր հայտարարվել, որ նրա վիճակն ամենածանրն է։ Աղջկա մոտ պայթյունի հետեւանքով առաջացել են աջ զստոսկրի եւ աջ ազդրի շրջանի կտրած, պատռած վերքեր։ Վիրահատությունը տեւել է ավելի քան երկու ժամ։ «Ռուբինայի վիճակն առայժմ մնում է կայուն ծանր՝ դրական դինամիկայով։ Եղբայրը լավ է. Իսկ մենեջեր Զարուհին աջ կոնքի շրջանում վերք ուներ, կարված է: Վիճակը բավարար է»,- նկարագրեց «Սուրբ Գրիգոր Լուսավորիչ» բժշկական կենտրոնի փոխտնօրենը։
Աննա ԶԱԽԱՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
