Այս ապարատներից, որոնք այսօր գրեթե ամեն քայլափոխի կան, օգտվողները հավանաբար չեն էլ պատկերացնում, թե սանիտարահիգիենիկ ինչ պայմաններով են դրանք աշխատեցնում: Նախ` որպես կանոն, դրանք հեռու են լինում հոսող ջրերից եւ լվացվում` մաքրվում են տեղում` հավաքված ջրով: Սարքի մեջ տեղադրված տարաները, որոնք մատակարարում են թեյ, սուրճ, շոկոլադ, կաթ, լվացվում են հենց փողոցում` առանց ախտահանության եւ լրացուցիչ մաքրող նյութերի առկայության: Ապարատն աշխատեցնողը, ասպես ասած, տարաները ողողում է եւ կրկին լիցքավորում, ժամանակ առ ժամանակ էլ նստվածքը քերում` թափում:
Այս ապարատների նկատմամբ վերահսկողություն մինչ օրս չի կատարվել: Այս մասին «Առավոտ»-ի հարցին ի պատասխան ասացին Սննդամթերքի անվտանգության պետական ծառայությունից` նշելով, որ այդ ապարատներն արդեն կառույցի ուշադրության շրջանակում են, եւ առաջիկայում պատրաստվում են ամբողջական վերահսկողական գործողությունների:
Լուսանկարը`
ԼՈՒՍԻՆԵ ԲՈՒԴԱՂՅԱՆԻ
«Առավոտ»
09.10.2018
