Հովք գյուղում բնակվում են Ադրբեջանից բռնագաղթած մեր հայրենակիցները: 430 բնակիչ ունեցող Հովքը մաս է կազմում խոշորացված Դիլիջան համայնքի: Հովքի բնակիչները դժգոհություն են հայտնել, որ այս տարվա աշնանը գործարկված, Դիլիջան-Հովք միկրոավտոբուսի դիմապակուն ձեւական է գրված Հովքի անվանումը, Հովք գնացողը կամ Հովքի բնակիչը չի կարողանում դրանից օգտվել, որովհետեւ միկրոավտոբուսը Հովք չի հասնում, այն Հաղարծին գյուղում շրջադարձ է կատարում եւ վերադառնում Դիլիջան:
Խնդրի վերաբերյալ զրույց ունեցանք Դիլիջան համայնքի ղեկավար Արմեն Սանթրոսյանի հետ: Նա ասաց, որ բազում անգամներ երթուղային միկրոավտոբուսը միջպետական ավտոճանապարհից Հովք է բարձրացել, սակայն գյուղից ուղեւորներ չեն եղել: Համայնքի ղեկավարը հայտնեց, որ ըստ ժամանակացույցի ՝ միկրոավտուբուսը շաբաթական 2 օր է Հովք մեկնում:
Հովքի բնակիչներից էլ կարծիք եղավ, որ Հովքից Դիլիջան մեկնողների թիվը քիչ է ոչ միայն այն պատճառով, որ գյուղը քիչ բնակիչ ունի, այլեւ այն պատճառով, որ Հովքի բնակիչների զգալի մասն ավելի շատ գործեր ունի Տավուշի մարզկենտրոն Իջեւանում, այնտեղ է մեկնում: Իջեւանը, ինչպես եւ Դիլիջանը Հովք գյուղից գտնվում է 17 կմ հեռավորությամբ:
Ոսկան ՍԱՐԳՍՅԱՆ
