Այսօր Հատուկ քննչական ծառայությունը վերադարձրել է գործարար, հ2 հեռուստաընկերության տնօրեն եւ սեփականատեր Սամվել Մայրապետյանի անձնագիրը, սակայն Մայրապետյանը չի կարող երկրից դուրս գալ: ՀՔԾ-ն, սակայն, անձնագիրը վերադարձնելու գրության մեջ չի նշել, թե ինչ պատճառաբանությամբ է արգելում Մայրապետյանին երկրից դուրս գալ՝ բուժումն արտերկրում կազմակերպելու համար: Այս մասին Aravot.am-ի հետ զրույցում ասաց Սամվել Մայրապետյանի շահերի պաշտպան Կարեն Բատիկյանը:
Հիշեցնենք, որ դեկտեմբերի 27-ին դատարանի որոշմամբ Սամվել Մայրապետյանի խափանման միջոցը փոխվեց եւ նա 30 միլիոն դրամ գրավի դիմաց ազատ արձակվեց:
Պարոն Մայրապետյանը մեղադրվում է կաշառքի միջնորդության համար:
Ազատության մեջ հայտնվելուց հետո էլ անգամ, ինչպես Կարեն Բատիկյանը նշեց, Սամվել Մայրապետյանը տուն չի գնացել Ամանորը հարազատների հետ նշելու եւ մնացել է այն հիվանդասենյակում, որտեղ պառկած էր մինչ անազատությունը: Ըստ պաշտպանի, առողջական վիճակի պատճառով բժիշկները թույլ չեն տվել տուն գնալ:
Aravot.am-ի հարցին, թե ի՞նչ են պատրաստվում անել, Կարեն Բատիկյանն ի պատասխան ասաց՝ որ անձնագիրը դեռեւս նոր են վերցրել, կորոշեն հետագա քայլերը:
Հիշեցնենք, որ Մայրապետյանի անձնագրի հարցով պաշտպանը նաեւ Մարդու իրավունքների եվրոպական դատարան՝ ՄԻԵԴ էր դիմել:
Լուսինե ԲՈՒԴԱՂՅԱՆ
