ԵԱՀԿ գործող նախագահ, Սլովակիայի արտգործնախարար Միրոսլավ Լայչակը հետևողականորեն կոչ է արել Հայաստանին ու Ադրբեջանին պահպանել այն խթանը, որին հասնել են Լեռնային Ղարաբաղի հակամարտության կարգավորման գործընթացում:
«Գոյություն ունի նոր խթան, նոր ակնկալիքներ… Մենք այժմ պետք է այդ խթանը վերածենք տեղերում որոշակի քայլերի»,- ասել է Լայչակը Վաշինգտոնում ադրբեջանական «Թուրան» գործակալության հետ զրույցում:
Խոսելով բանակցային գործընթացում վերջին զարգացումների մասին՝ Լայչակը բարձր է գնահատել կողմերի միջև ակտիվացած երկխոսությունը՝ ԵԱՀԿ Մինսկի խմբի համանախագահների մասնակցությամբ:
«Ադրբեջանի և Հայաստանի առաջնորդները հանդիպել ենք երեք անգամ ոչ պաշտոնապես, իսկ արտգործնախարարները պարբերաբար հանդիպել են: Վիեննայում եղավ կարևոր հանդիպում.. Մենք պետք է շարունակենք զարգացնել այդ դրական խթանը»,- ասել է նա:
Կարդացեք նաև
Լայչակն ավելի վաղ ելույթ էր ունեցել ԱՄՆ Հելսինկյան կոմիտեում՝ խոսելով 2019թ. Սլովակիայի նախագահությամբ ԵԱՀԿ առաջնահերթությունների մասին:
Անդրադառնալով Լեռնային Ղարաբաղի հակամարտությանը՝ նա ասել էր. «Չնայած որոշակի դրական իրադարձություններ տեղի ունեցել են, մենք պետք է շատ ավելին տեսնենք՝ իրական առաջընթացի մասին խոսելու համար»:
Նա նաև կարևորել էր ամբողջ ԵԱՀԿ տարածությունում ժողովրդավարական փոխակերպումները: «Մենք այստեղ ենք՝ աշխատելու առավել անվտանգ և ժողովրդավարական տարածաշրջանում, որտեղ յուրաքանչյուր մարդ ունի անվտանգություն և անհատական իրավունքներ»,- ասել էր նա:
Պատրաստեց՝ Վիկտորյա ԱՆԴՐԵԱՍՅԱՆԸ
