Այսօր Երեւանի քաղաքապետարանում տրանսպորտային նոր ցանցի ներդրման շուրջ քննարկում էր, որին մասնակցում էին ավագանու անդամներ, հասարակական կազմակերպությունների ներկայացուցիչներ:
Հանրային տրանսպորտի բարեփոխումների ծրագրի մասին քաղաքապետի առաջին տեղակալ Հրաչյա Սարգսյանն ասաց՝ այս 6 ամիսներին փորձել են հասկանալ ինչ ուղղությամբ են աշխատելու եւ արդեն մոտեցել են վերջնական փուլին:
Ըստ Սարգսյանի, նոր երթուղային ցանցի ներդրման համար ի սկզբանե նախատեսվում էր պետական պարտքով՝ վարկով, հավելյալ ավտբուսներ ձեռք բերել, հետո փոփոխություն է իրականցվել ու առաջարկվել, որ այն իրականացվի PPP (պետական-մասնավոր հատված համագործակցությամբ) մոդելով, դրան զուգահեռ քննարկվում է Ասիական բանկի հետ, որպեսզի PPP մոդելի փաթեթը ներդրվի եւ միազգային օպերատորներ ներգրավվեն:
Քննարկմանը ներկա «Սպառողների միության» նախագահ Արմեն Պողոսյանը հետաքրքրվեց՝ տնտեսական ինչ համագործակցությամբ է նախատեսվում գործարկել նոր ցանցը՝ պետք է լինի ԲԲԸ, կապիտալի մի մասը քաղաքային իշխանությունը ներդնի, մյուսն՝ արդեն գործող սուբյեկտները եւ այլն: «Եթե ձեր ասած մոդելով է, ապա ներդրողը պետք է հասկանա՝ որքան մասնակցություն պետք է ունենա եւ որքան՝ շահութաբերություն: Մինչեւ ցանցի ներդրման չափորոշիչներին հստակ հավանությունը չլինի, չենք կարող ասել՝ նման մոդել պետությունը կիրականացնի՞, թե՞ այլ մոդել»,-պատասխանեց Սարգսյանը:
Կարդացեք նաև
Պողոսյանը շարունակեց, խոսեց հանրային տրանսպորտային բիզնեսում ստվերի մասին: Ըստ Պողոսյանի, Երեւանում ամեն օր ուղեւորահոսքը 600 հազարից ավելի է, եւ իր ունեցած հարկային տվյալներով՝ 50% ստվեր կա. «Կեսը ստվերային շրջանառություն է: 49 մեքենա շահագործողը 3 վարորդ ունի: Հիմա փոխվում է վիճակը, բայց էլի ստվերը 50% տոկոս է»: Փոխքաղաքապետն արձագանքեց՝ խնդիրը կարեւոր է, բայց իրենք նոր ցանցն են քննարկում:
Երեւանի կայուն զարգացման ներդրումային ծրագրի ղեկավար Նորա Մարտիրոսյանը ներկայացրեց տրանսպորտային նոր ցանցի կառուցվածքը՝ երթուղիների քանակը՝ ներկայումս գործող 111 երթուղու փոխարեն 42 ավտոբուսային երթուղիներ, 11-ը՝ հիմնական, 30-ը՝ սնուցող եւ 1-ը՝ օդանավակայան տանող արագընթաց երթուղի:
Մարտիրոսյանի խոսքերով՝ տրանսպորտային միջոցների քանակն էլ էապես նվազելու է՝ լինելու բացառապես ավտոբուս՝ 845 հատ, 101 տրոլեյբուս: 18 մետրանոց միակցված ավտոբուսների քանակը 249-ն լինելու, մեծ՝ 12 մետրանոց ավտոբուսների քանակը՝ 34 եւ միջին տեղատարոնակության 7-8,5 մետրանոց 562 ավտոբուսներ են լինելու: Սրանց մեջ ներառվում են նաեւ պահուստային ավտոբուսները, որոնք կազմում են ընդհանուր պարկի 15%-ը: Ըստ Մարտիրոսյանի, ամեն օր ցանց է դուրս գալու 733 ավտոբուս: Բացի այս, կրճատվել է ներկայումս գործող ցանցի կիլոմետրաժը, կրկնվող գծերը եւս նախատեսվում է կրճատել: Այսօր գործող 3961 կմ ցանցը դառնալու է 1134 կմ է լինելու: Տրանսպորտային միջոցների ընդհանուր վազքը եւս կրճատվելու է, շարժակազմի տարեկան վազքն գործող ցանցում 200 միլիոն կմ է, նախատեսվում է այն 4 անգամ կրճատել:
«Ամեն լավ բան ունի իր դժվարության «կոմպոնենտ»,-ասաց Մարտիրոսյանը, եւ դա ուղեւորների համար մի կետից մյուս կետը հասնելու եւ 2 տրանսպորտից օգտվելու գործոնն է: Սակայն, Մարտիրոսյանը փորձեց սփոփել տրանսպորտից օգտվողներին՝ «Եթե ուզում ենք եվրոպական չափանիշներով ցանց ունենալ, այնտեղ տեղափոխելի ցանցեր են՝ հիմնական եւ սնուցող»: Այսինքն՝ Եվրոպական երկրներում էլ ուղեւորները մի կետից մյուսին հասնելու համար հիմնականում տրանսպորտային երթուղիները փոխում են: Երեւանում, ըստ Մարտիրոսյանի, նախատեսվում է՝ ցանցի 45 տոկոսը կլինի առանց տեղափոխերի, 37 տոկոսը՝ մեկ տեղափոխող, 15 տոկոսը՝ 2 տեղափոխով, 3 տոկոսը՝ 3 տեղափոխով: Մարտիրոսյանն ասաց, որ միջազգային խորհրդատուն այս ցանցի գործարկելու դեպքում բնակչության 50 տոկոսը կօգտվի առանց տեղափոխով ավտոբուսների երթուղիներից:
Նորա Մարտիրոսյանի տեղեկացմամբ՝ տրոլեյբուսային 5 գծերը պահպանվելու են, այս երթուղում նոր տրանսպորտային միջոցներ են ներդրվելու, 34-ը՝ վերազինելու ու արդիականացնելու:
Տրանսպորտային միջոցների երթեւեկի հաճախականությունը միջինում 9 րոպե է լինելու, պիկ ժամերին ու մարդաշատ երթուղիներում՝ ավելի կարճ, որոշ տեղերում՝ 8-15 րոպե է լինելու հաճախականությունը: Նախատեսվում է, որ հասարակական տրանսպորտը գործելու է ժամը 6.45-ից մինչեւ 23.45:
«Իրազեկ եւ պաշտպանված սպառող» հ/կ նախագահ Բաբկեն Պիպոյանը մի քանի հարց ուղղեց՝ սահմանված չափորոշիչներն ինչպես են ազդելու գնագոյացման վրա, ինչ սակագին է գործելու՝ տեղափոխով տրանսպորտի դեպքում արդյոք նույն սակագինն է լինելու, արդյոք նախատեսում են տրոլեյբուսի փոխարեն էլեկտրոավտոբուս ներդնել եւ այլն:
Սակագնի, ուղեվարձի մասին փոխքաղաքապետն ասաց, որ այս պահին հստակ բան չի կարող ասել, քանի դեռ վերջնական որոշում չկա, ինչպես նաեւ պարզ չէ, թե ինչ չափորոշիչներ են ընտրվելու: Օրինակ՝ տրանսպորտային միջոցները լինելու են ջեռուցման եւ հովվացման համակարգով, թե՝ ոչ: Ինչ վերաբերում է էլեկտրոավտոբուսներին, ապա Սարգսյանն ասաց, որ մեզ մոտ դրա համար անհրաժեշտ ենթակառուցվածքները չկան, էլեկտրոավտոբուսը 2 պտույտից հետո պետք է լիցքավորվի:
Հարցին՝ երբ կներդրվի տրանսպորտային նոր համակարգը, փոխքաղաքապետը պատասխանեց՝ «Չեմ ցանկանում ժամկետը ֆիքսել, ասել՝ այս տարի կլինի»:
Փոխքաղաքապետն առաջարկեց քննարկման մասնակիցներին իրենց առաջարկները ներկայացնել, եւ խնդրի վերջնական լուծում ունենալու համար նման քննարկումները հաճախակի կլինեն, եւ արդեն շուտով միջազգային խորհրդատուին պետք է ներկայացվի շահագրգիռ կողմի եզրակացությունները:
Նելլի ԲԱԲԱՅԱՆ
