Ա.Տիգրանյանի անվան երաժշտական դպրոցում կայացավ միջազգային եւ հանրապետական մրցույթների դափնեկիր (դաշնամուր) Պարույր Մովսեսյանի մենահամերգը (դասատու՝ Ռուզաննա Հովհաննիսյան): Ծրագրում՝ Բախ, Մոցարտ, Շուման, Մաշկովսկի, Կոմիտաս-Անդրիասյան, Կլենգել, Ռախմանինով, Բաբաջանյան, Սարտորի եւ Պարույր Մովսեսյան:
Ինչպես նշեց Պարույրի դասատուն՝ Ռուզաննա Հովհաննիսյանը, դպրոցում հայտնվելը նախախնամության արդյունք էր: 2012 թ.-ին է Պարույրն ընդունվել երաժշտական դպրոց եւ առաջին իսկ պահից լավ տպավորություն է թողել:
Մանրամասն՝ տեսանյութում:
«Պարույրը շատ է սիրում բեմը…խորը հոգի ունի, խելացի է, հարուստ երեւակայությամբ է օժտված: Իսկ մտքի թռիչք ունեցող մարդկանց հետ որքան հաճելի, նույնքան բարդ է աշխատելը»,-խոստովանում է Պարույրի դասատուն:
Aravot.am-ի հետ զրույցում՝ խոսելով համերգի ծրագրից, տիկին Հովհաննիսյանը նշեց, որ կան ստեղծագործություններ, որոնք հենց Պարույրն է ընտրել: Ասում է՝ հաշվի է առնում սանի նախասիրությունները՝ նկատի ունենալով, որ նա այն աստիճան լավ է նվագում, որ կարող են չկասկածել, որ արդյունքը կատարյալ կլինի: «Ես ամեն բարդության ստեղծագործություն հանձնարարում եմ կատարել և, իհարկե, օգնում եմ, որ հաղթահարի»,-ասում է դասատուն:
Մանրամասն՝ տեսանյութում:
Aravot.am-ի զրույցում Պարույր Մովսեսյանը հայտնեց, որ մանկուց սիրել է երաժշտությունը, մանավանդ դաշնամուր, դրա համար ցանկացել է դառնալ դաշնակահար: «Ինձ դուր է գալիս այդ արվեստը: Իմ իդեալը Արմեն Լեւոն-Մանասերյանն է, շատ կուզենայի դառնալ իր նման փայլուն դաշնակահար»,-ասում է պատանին: Ինչ վերաբերում է առաջին անգամ նոր ստեղծագործություն կատարելուն, այս մասին էլ նշեց. «Սկզբում մի քիչ դժվար է լինում, հետո սկսում եմ ընտելանալ եւ սիրով նվագում եմ»:
Իր սիրելի կոմպոզիտորը Առնո Բաբաջանյանն է: Պարույր Մովսեսյանն արդեն ավելի քանի տասը մրցույթում հաղթող է: Տպավորվել է հատկապես Վրաստանում կայացած մրցույթով, քանի որ ունկնդիրը հիացած էր իրենով:
Մանրամասն՝ տեսանյութում:
Պարույր Մովսեսյանն արդեն ավարտել է ութերորդ դասարանը, իններորդ դասարան կգնա Չայկովսկու անվան դպրոցում: «Իմ երազանքն է դառնալ լավ դաշնակահար եւ ամենակարեւորը՝ հայտնի»,- ասաց պատանի դաշնակահարը:
Մանրամասն՝ տեսանյութում:
Մենաամերգի ընթացքում նրա հետ հանդես եկան դպրոցի այլ սաներ եւս: Իսկ Մերի Միսակյանը նրա նվագակցությամբ կատարեց Արամ Սաթյանի «Կապույտ երազը» եւ հանրահայտ Padam, padam երգը: Վերջինը անակնկալ էր Ռուզաննա Հովհաննիսյանի համար:
Գոհար ՀԱԿՈԲՅԱՆ
Հաջողություն եմ մաղթում … Հարգանքով՝ Աշոտ Բաբայան