Ազգային ժողովն այսօր քննարկում է խորհրդարանի նախագահ Արարատ Միրզոյանի հեղինակած օրինագծերի փաթեթը, որը, ինչպես Միրզոյանն էր ավելի վաղ հայտարարել, ավելի մեծ լիազորություններ է տալիս ընդդիմությանը, նաեւ՝ պարունակում «վեթինգի» գործընթացի մեկնարկը նախանշող կարգավորում:
«Լուսավոր Հայաստան» խմբակցության պատգամավոր Արման Բաբաջանյանը հետաքրքրվեց՝ ինչո՞ւ եք այդ օրինագծերից մեկով առաջիկայում ստեղծվելիք կոռուպցիայի կանխարգելման հանձնաժողովին վերապահում միայն խորհրդատվական գործառույթ՝ դատավորների եւ այլ պաշտոնյաների բարեվարքության համար:
Արարատ Միրզոյանը նախ նշեց, որ դատական համակարգի առողջացման մասին խոսելիս չպետք է միայն մեկ օրենքի նախագիծ ունենալ աչքի առաջ. «Առանձին օրենքներում կարգավորումներով պետք է հասնենք դրան, ինչպես այս պարագայում: Կոռուպցիայի կանխարգելման հանձնաժողովին առաջարկում եմ իրավունք վերապահել դատավորների բարեվարքության վերաբերյալ խորհրդատվական բնույթի եզրակացություն ներկայացնելու: Դա չափազանց ուժեղ գործիք է: Ինչո՞ւ միայն խորհրդատվական, որովհետեւ հակառակ դեպքում, եթե տրվի կատարման ենթակա եզրակացություն, ունքը դզելու փոխարեն աչքն էլ կարող ենք հանել»:
Արման Բաբաջանյանը պնդեց, որ հենց «աչքը հանելու» մասին է խոսքը, որովհետեւ «վեթինգի» մասին մեկ առանձին օրենք ունենալու փոխարեն տարբեր օրենքներով են փորձում առաջնորդվել, մինչդեռ կարող էին անցումային շրջանի եւ հետագայում կանոնավոր «վեթինգի» համար առանձին կառույց ունենալ:
Կարդացեք նաև
Արարատ Միրզոյանը նշեց, որ դա էլ է մոտեցում. «Վստահ չեմ, բայց տպավորությունն այն է, որ նոր մարմնի ստեղծման կարիք չկա: Օրինակ՝ ԲԴԽ-ն էլ ունի համապատասխան բոլոր գործառույթները»:
Հավելենք, որ օրինագծերի փաթեթը դեռ պետք է քվեարկվի խորհրդարանում:
Լուիզա ՍՈՒՔԻԱՍՅԱՆ
