«Շնորհակալ եմ Ազգային ժողովի պատգամավորներ Նաիրա Զոհրաբյանին, Տիգրան Կարապետյանին, Արփի Դավոյանին եւ Արման Բաբաջանյանին՝ իմ հարցով հետաքրքրվելու, խնդիրս բարձրաձայնելու համար»,- ասաց խմբագրություն զանգահարած՝ կալանքից երեքշաբթի ազատված 22-ամյա Գոռ Գորոյանը։
Հիշեցնենք, որ Գոռ Գորոյանը զինապարտ է, նրան մեղադրանք էր առաջադրվել ՀՀ քրեական օրենսգրքի 327 հոդվածի 1-ին մասի հատկանիշներով՝ ժամկետային զինվորական ծառայության հերթական զորակոչից խուսափելը՝ այդ ծառայությունից օրինական հիմքերի բացակայության դեպքում։
Ըստ Գոռ Գորոյանի՝ ինքը ցանկանում է ծառայել ՀՀ զինված ուժերում ու չի խուսափել ծառայությունից։ Պարզապես՝ հասցեի փոփոխման պատճառով չի ստացել ծանուցագիը եւ չի ներկայացել զինկոմիսարիատ։ Զինապարտի խոսքով՝ ինքը տարածքային զինկոմիսարիատին տեղեկացրել էր բնակավայրի փոփոխության մասին։
Գոռ Գորոյանի նկատմամբ հայտարարվել էր հետախուզում եւ նրան կալանավորել էին։ Այս մասին «Առավոտի» հրապարակմանն արձագանքեց ՀՀ քննչական կոմիտեն՝ հորդորելով զերծ մնալ իրականությանը չհամապատասխանող լուրեր տարածելուց։
Կարդացեք նաև
Արձագանքեցին պատգամավորները՝ դիմելով ՀՀ պաշտպանության նախարարություն, գլխավոր դատախազություն։ Եվ ահա՝ հուլիսի 9-ին Արմավիրի ընդհանուր իրավասության դատարանը՝ նախագահող դատավոր Հրաչիկ Սարգսյան, վճռեց ՝ Գոռ Գորոյանին դատապարտել երկու տարվա ազատազրկման՝ պատիժը պայմանական չկիրառել, որպեսզի Գոռը զորակոչվի բանակ։
«Հիմա գնում եմ զինկոմիսարիատ՝ գրանցվելու, որպեսզի այս զորակոչին մեկնեմ բանակ։ Շնորհակալ եմ նաեւ Ձեր կայքին՝ ճակատագրիս հանդեպ անտարբեր չմնալու համար։ Եթե չլիներ հրապարակումը, գուցե ես այս պահին կալանավայրում լինեի»,-հուզված նշեց Գոռը։
Արմեն ԴԱՎԹՅԱՆ
