Այսօր, երբ Երեւանի քաղաքապետարանում ավագանու նիստ էր տեղի ունենում, քաղաքապետարանի շենքի դիմաց Վարդաշենի հանրակացարանների բնակիչները բողոքի ցույց էին անում՝ պահանջելով 66/1 եւ 68ա շենքերի սեյսմակայունությունը կրկին որոշել: Բանն այն է, որ 2015 թվականին այդ շենքերը ճանաչվել են 3-րդ կարգի վթարային, սակայն, բնակիչները խիստ կասկածներ ունեն, որ իրենց շենքերն արդեն դարձել են 4-րդ կարգի, քանի որ այդ տարիների ընթացքում ամրացման աշխատանքներ չեն կատարվել՝ չնայած, որ նախատեսված է եղել վերանորոգում եւ ամրացում: Նրանց խոսքով, շենքերն արդեն թեքվել են, պատերին մեծ-մեծ ճաքեր են առաջացել, անձրեւաջրերը վերեւի հարկից մինչեւ նկուղ են լցվում եւ այդ ամենը խարխլել է շենքի հիմքերը: Սակայն, ինչպես բնակիչներն են ասում, շենքի կարգը ոչ միայն նույնն է մնացել, այլեւ հրաժարվում են կրկին սեյսմակայունություն որոշել:
Վարդաշենցիների բողոքները լսելու իջան Երեւանի ավագանու ԲՀկ խմբակցության անդամները: Նրանք բնակիչներին հորդորեցին սպասել՝ մինչեւ ավագանու նիստը կվերջանա: Ապա հարցը հնչեցրին ավագանու նիստում:
Ավագանու ԲՀԿ անդամ Մարկոս Հարությունյանը փոխքաղաքապետ Հրաչյա Սարգսյանին հարցրեց՝ որքանով է օպտիմալ 3-րդ կարգի վթարայնություն ունեցող շենքի հարեւանությամբ երկու տասնյակից ավելի գումար ծախսել խաղահրապարակի վրա, բայց ոչ մի միլիոն չի ծախսվում շենքի ամրացման ուղղությամբ:
Կարդացեք նաև
Փոխքաղաքապետը պատասխանեց, որ դեկտեմբերին վթարային երեք շենքերի համար գումար է հատկացվել:
Բնակիչներն Aravot.am-ի հետ զրույցում ասացին,որ իրենց բնակվելու պայմանները հակասանիտարական են՝ ընդհանուր լոգարան-զուգարանով, շենքում առնետներ, մողեսներ, մորմեր, օձեր ու կարիճներ են վխտում: Նրանց խոսքով, այդ պայմաններում հիվանդ մարդիկ, փոքրիկ երեխաներ են ապրում, ունեն ապրիլյան պատերազմի մասնակից զինվորներ եւ ապագա զինվորներ:
Վարդաշենցիների խոսքով, 2011 թվականից իրենց պայմանները բարելավելու, շենքը ամրացնելու խնդրանքներով դիմումներ են ներկայացնում Երեւանի քաղաքապետարան, սակայն անօգուտ:
Նիստի ավարտին բնակիչներին ընդունեցին քաղաքապետարանի կոմունալ եւ սեյսմիկ բաժինների պատասխանատուները: Նրանք խոստացան՝ 15-20 օրվա ընթացքում կրկին որոշել շենքի սեյսմակայունության աստիճանը, որից հետո միայն կորոշվի ինչ անել:
Մանրամասները՝ տեսանյութում
Լուսինե ԲՈՒԴԱՂՅԱՆ
