ԱԺ «Իմ քայլը» խմբակցության ղեկավար Լիլիթ Մակունցն այսօր խորհրդարանում լրագրողների հետ զրույցում հայտարարեց, որ խմբակցությունը համաձայն է Ամուլսարի շահագործման հարցով վարչապետի հայտնած դիրքորոշման հետ: Անգամ այն պատգամավորները, որոնք դեմ են հանքի շահագործմանը:
Հիշեցնենք, քիչ առաջ, ֆեյսբուքյան ուղիղ եթերում, վարչապետ Նիկոլ Փաշինյանը նույնպես հայտարարել էր, որ այժմ իրավական հիմք չունեն «Լիդիան»-ին արգելելու Ամուլսարի հանքը շահագործել: Ընկերությունը վերահաստատել է, որ հանքը շահագործելու են ամենաբարձր մակարդակով, թույլ չեն տալու աղտոտումներ: Իսկ կառավարությունը, վարչապետի հավաստմամբ, կարող է ամենօրյա մոնիթորինգ անցկացնել. որեւէ շեղում հայտնաբերելու պարագայում միայն կարող է զրկել «Լիդիան»-ին արտոնագրից: Վարչապետը Բնապահպանության տեսչական մարմնին հանձնարարել է ստուգել այն խնդիրները, որ նշված են «Էլարդ»-ի զեկույցում, շարունակվելու է նաեւ հարուցված քրեական գործի նախաքննությունը եւ Յուրի Իվանյանը այլեւս չի ղեկավարի քննչական խումբը: Նրա փոխարեն նշանակվել է Քննչական կոմիտեի նախագահի տեղակալ Արսեն Այվազյանը: Նա նաեւ բնապահպաններին խնդրել է ապաշրջափակել Ամուլսարի հանք տանող ճանապարհը՝ վստահեցնելով, որ մինչեւ ապրիլ շինարարություն այնտեղ չի իրականացվի, իսկ ճանապարհը փակ պահելը մեծ հարված է Հայաստանի տնտեսական իմիջին։
Լիլիթ Մակունցը վարչապետի ուղիղ եթերից երկու հանգամանքի վրա է շեշտադրում անում`Հայաստանի իրավական պետություն լինելու փաստը եւ այն, որ չեն կարող բնակիչների շահերը հաշվի չառնվել:
Հարցին`եթե այնուհանդերձ դեպի Ամուլսար տանող ճանապարհը չապաշրջափակվի, իշխանությունն ուժ կկիրառի՞, Լիլիթ Մակունցը պատասխանեց, որ գուշակություններ չի ցանկանում անել`սպասենք իրադարձությունների զարգացմանը:
Կարդացեք նաև
Այլ մանրամասները` տեսանյութում
Նելլի ԳՐԻԳՈՐՅԱՆ
