Կանանց խնամքի եւ խնամված արտաքինի անբաժան մասն է դարձել մատնահարդարումը։ Ոմանք նախընտրում են իրենց եղունգների խնամքով զբաղվել ինքնուրույն, մյուսները՝ այցելել գեղեցկության սրահներ՝ ավելի գեղեցիկ եւ անվնաս աշխատանք ստանալու համար։ Սակայն արտաքուստ կոկիկ տեսքը միշտ չէ, որ անվնաս կարող է լինել։
Եղունգների խնամքը մանրակրկիտ եւ ստերիլ գործիքներով աշխատանք է ենթադրում, հակառակ դեպքում՝ արդյունքը կարող է անդառնալի լինել։
Հայաստանում վերջին շրջանում գրանցվել է հեպատիտ Ց 3-4% տարածվածություն, որն առաջացել է մատնահարդարման, ոտնահարդարման, դաջվածքների եւ այլ կոսմետոլոգիական միջամտությունների արդյունքում։
2015 թվականից ի վեր հաստատվել է բժշկական գործիքների ախտահանման եւ մանրէազերծման ստանդարտ, որով աշխատում են բժշկական կազմակերպությունները։ Սակայն նույնն ասել կոսմետոլոգիական կենտրոնների մասին՝ բարդ է. դրանք մասնավոր են, ինչը դժվարացնում է իրազեկման ու վերահսկման գործընթացը։
Կարդացեք նաև
Հեպատիտ C-ից բացի, որի դեպքերը բավականին շատ են, տարածված են նաեւ մաշկային այլ խնդիրներ։ Մեր զրուցակից Սեդան (անունը փոխված է), որ եւս օգտվում է գեղեցկության սրահներից, պատմեց, որ մատնահարդարումից 6 օր անց սնկային հիվանդություն է սկսվել: «Դիմել եմ բժշկի, բուժվել եմ եւ այժմ հետեւողական եմ նման հարցերի առումով»,-ասաց նա։
Սակայն, ինչպես շատերը, Սեդան եւս քայլեր չի ձեռնարկել սրահի եւ մատնահարդարի անբարեխիղճ աշխատանքի դեմ: «Միեւնույն է, չէի կարողանալու ապացուցել եւ իզուր քաշքշուկի մեջ էի ընկնելու»,-ասաց Սեդան։
Ոլորտն ուսումնասիրող Եվայի խոսքով՝ մատնահարդարման գնալուց առաջ պետք է հարցնել ախտահանման մասին. «Միայն փակ քրաֆթ փաթեթներից գործիքների հանելը բավարար չէ։ Դրա վրա կա ինդիկատոր, որը գույնը փոխում է ախտահանումից հետո. դրա մասին գրված է փաթեթի վրա»։
Շատ կանայք եւ աղջիկներ նախընտրում են գնել իրենց սեփական գործիքները եւ դրանցով այցելել մատնահարդարին։ Սակայն այս դեպքում եւս ախտահանումը պարտադիր է եւ պետք չէ բավարարվել միայն սպիրտով մաքրումով։
Անկախ այս ամենից, այսօր մատնահարդարման սրահներից օգտվողների թիվը մեծ է, ինչը ստիպում է առավել հետեւողական լինել ոլորտի նկատմամբ։ Տարեկան առնվազն մեկ անգամ աշխատակազմի՝ հեպատիտի հետազոտությունը կնպաստի թե՛ հիվանդության վաղ հայտնաբերմանը, թե՛ սպասարկվող անձանց շրջանում վարակի տարածման կանխարգելմանը։
Սյուզի ՆԱՎԱՍԱՐԴՅԱՆ
«Առավոտ» օրաթերթ
19.10.2019
