Մոտ տասը օր առաջ հեռահաղորդակցության օպերատոր «Վեոն Արմենիա» ընկերությունը, որը հանրությանն առավել հայտնի է «ԱրմենՏել» անունով եւ իր «beeline» ապրանքանիշով, պայմանավորվածություն է ձեռք բերել իր բաժնետոմսերը «Յուքոմ» ընկերությանը վաճառելու:
Լուրը «ՍիվիլՆեթի» հետ զրույցում հաստատել է Հանրային ծառայությունները կարգավորող հանձնաժողովի (ՀԾԿՀ) նախագահը՝ Գարեգին Բաղրամյանը՝ նշելով, որ ընկերությունները գնման մասին դիմում են ներկայացրել հանձնաժողով: ՀԾԿՀ ղեկավարը նաեւ հայտնել է, որ գործընթացը բարդ է եւ պետք է անցնի այլ գերատեսչություններով, նախարարություններով, եւ որ իր համաձայնությունը պետք է տա նաեւ Ազգային անվտանգության ծառայությունը:
Եվ չնայած ՀԾԿՀ-ն հաստատել էր լուրը, Aravot.am-ի հարցին ի պատասխան` «Վեոն Արմենիա» ընկերությունից որեւէ տեղեկություն չհայտնեցին, թե արդյոք վաճառելու մտադրություն ունեն, ինչո՞ւ են վաճառում կամ ե՞րբ է նախատեսվում գործարքը: Ի պատասխան` ընկերության հասարակայնության հետ կապերի բաժնի ղեկավար Նաիրա Նազարյանն ասաց, որ նման հարցերը մեկնաբանվում են իրենց գլխամասային գրասենյակի կողմից, որը գտնվում է Ամստերդամում: «Դիմեք այդ հարցով գլխամասին»,- նշեց Նաիրա Նազարյանը:
Ամանորյա տոներից հետո հարցում կուղարկենք նաեւ «Վեոն Արմենիայի» գլխամասային գրասենյակ:
Կարդացեք նաև
Գործընթացի վերաբերյալ դիմում է ստացել նաեւ Տնտեսական մրցակցության պաշտպանության պետական հանձնաժողովը՝ ՏՄՊՊՀ-ն: Aravot.am-ի հարցին ի պատասխան` հանձնաժողովից հայտնեցին, որ դիմումը երեկ առավոտյան են ստացել, դեռ չեն ուսումնասիրել, եւ որ սույն դիմումով ընկերությունները խնդրում են համակենտրոնացնել «Յուքոմն» ու «Վեոն Արմենիան»: Ըստ նույն աղբյուրի, այս գործով վարույթ կհարուցվի Ամանորյա տոներից հետո. «Երբ ուսումնասիրենք՝ կիրազեկենք»:
«Յուքոմ» ընկերությունից մեր հարցին ի պատասխան` ասացին, որ նախընտրելի է, որպեսզի առաջին մեկնաբանությունը իրենց գործընկեր՝ «Վեոն Արմենիա» ընկերությունից լինի, քանի որ «Էլեկտրոնային հաղորդակցության մասին» ՀՀ օրենքի 14-րդ հոդվածի 1-ին մասի համապատասխան` «Վեոն Արմենիա» ընկերությունն է դիմում ՀԾԿՀ եւ հայցում գործարքն իրականացնելու համաձայնությունը:
Հիշեցնենք, որ 2015 թվականին «Յուքոմը» գնեց նաեւ «Օրանժ Արմենիա» ընկերությունը:
Լուսինե ԲՈՒԴԱՂՅԱՆ
