Եվրոպական խորհրդի խորհրդարանական վեհաժողովի (ԵԽԽՎ) Ադրբեջանի հարցով համազեկուցողներ Ստեֆան Շենախը (Ավստրիա) և Սըր Ռոջեր Գեյլը (Մեծ Բրիտանիա) ափսոսանք են հայտնել առ այն, որ Ադրբեջանը չի կատարել Մարդու իրավունքների եվրոպական դատարանի որոշումը Հանրապետական այլընտրանքային կուսակցության (REAL) ղեկավար Իլգար Մամեդովի և 7 այլ ակտիվիստների դատավճիռները չեղարկելու վերաբերյալ: ՄԻԵԴ-ի որոշումն իրականացնելու վերջնաժամկետը լրացել է 2019թ. դեկտեմբերի 31-ին:
«Քանի դեռ ոչինչ չի փոխվել, սա նշանակում է, որ եթե Ադրբեջանի իշխանությունները չձեռնարկեն անհապաղ և պատշաճ գործողություններ մինչև հունվարի 10-ը՝ առաջադրման վերջնաժամկետը, պարոն Մամեդովը և նրա գործընկերները հնարավորություն չեն ունենա մասնակցելու այս տարվա փետրվարի 9-ին Ադրբեջանում սպասվող համապետական ընտրություններին»,- ասել են համազեկուցողները:
Նրանք նաև ընդգծել են, որ ազատ և արդար ընտրությունների անցկացման համար խոսքի և հավաքների ազատությունը պարտադիր պայման են:
Իլգար Մամեդովին անդրադարձել է նաև ԵԽԽՎ մեկ այլ՝ Ադրբեջանում քաղբանտարկյալների դեպերի վերաբերյալ զեկուցող Սուննա Էվարսդոտիրը (Իսլանդիա):
Կարդացեք նաև
«Ես խորապես հիասթափված եմ այն բանից, որ Ադրբեջանի իշխանությունները չչեղարկեցին Իլգար Մամեդովի և մյուս հայտատուների դատավճիռը այն դեպքում, երբ Եվրոպական դատարանը հայտնաբերել էր քաղաքական դրդապատճառներով քրեական դատական համակարգի չարաշահում»,- ասել է զեկուցողը:
Նրա խոսքով՝ սա կարևորագույն հարց է ինչպես շահագրգիռ անձանց, այնպես էլ ԵԽ-ում Ադրբեջանի դիրքերի համար, քանի որ եթե Ադրբեջանը չչեղարկի որոշումը նախքան հունվարի 10-ը, Մամեդովի չի կարողանա գրանցվել որպես նախագահական ընտրությունների թեկնածու: «Դա լրջորեն կասկածի տակ կդնի այդ ընտրությունների ժողովրդավարական օրինականությունը, Ադրբեջանի հարգանքը Դատարանի հեղինակության նկատմամբ, ինչպես նաև նրա ժողովրդավարության և ընդհանուր առմամբ օրենքի գերակայության նկատմամբ նրա ստանձնած հանձնառությունները»,- ասել է Էվարսդոտիրը՝ հավելելով, որ ԵԽԽՎ-ն ուշիուշով հետևում է իրավիճակին:
Պատրաստեց՝ Վիկտորյա ԱՆԴՐԵԱՍՅԱՆԸ
