ԱՄՆ նախագահ Դոնալդ Թրամփը ուղերձ է հղել Իրաքում ամերիկյան ռազմաբազաների հրթիռակոծությունից հետո: ԱՄՆ նախագահը նշել է. «Ամերիկայի ժողովուրդը պետք է շնորհակալ ու երջանիկ լինի, ոչ մի ամերիկացի չի տուժել երեկ գիշեր Իրանի ռեժիմի իրականացրած հարձակման հետևանքով: Մենք զոհեր չունենք, մեր բոլոր զինվորները անվտանգ են, և մեր ռազմակայանները նվազագույն վնաս են կրել»:
Թրամփը նշել է, որ քանի դեռ ինքն ԱՄՆ նախագահ է, Իրանը միջուկային զենք չի ունենալու. «Մենք դա երբեք թույլ չենք տա»:
Նրա խոսքով՝ հունվարի 3-ին սպանված իրանցի գեներալ Քասեմ Սոլեյմանին անձամբ էր ղեկավարում ԱՄՆ անձնակազմի դեմ հարձակումը, որի հետևանքով ամերիկացի ծառայողներից 4-ը վիրավորվել են, ևս 1 ամերիկացի էլ սպանվել է. «Նա էր կազմակերպել Բաղդադում Ամերիկայի դեսպանատան դեմ դաժան հարձակումը: Վերջին օրերին նա նոր հարձակումներ էր ծրագրում, բայց մենք կարողացանք կանգնեցնել նրան: Նրա ձեռքերը թաթախված էին և՛ ամերիկյան, և՛ իրանական արյունով»:
ԱՄՆ նախագահը նշել է, որ ԱՄՆ ուժերը պատրաստ են ամեն ինչի, սակայն այս պահին Իրանը նահանջում է, որը լավ է բոլոր կողմերի և ամբողջ աշխարհի համար:
Կարդացեք նաև
Միևնույն ժամանակ Թրամփն ազդարարել է Իրանի դեմ նոր պատժամիջոցների մասին: «ԱՄՆ-ն անմիջապես լրացուցիչ տնտեսական պատժամիջոցներ է սահմանելու Իրանի վարչակարգի դեմ», – ասել է նա՝ ավելացնելով, որ շարունակում են այլ տարբերակներ էլ դիտարկել Իրանի հրթիռային հարձակմանը պատասխանելու համար:
