Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանի լիագումար նիստի ընթացքում, երբ ԵԽԽՎ-ում հայկական պատվիրակության անդամ «Իմ քայլը» խմբակցության պատգամավոր Տաթևիկ Հայրապետյանը ելույթ ունեցավ՝ խոսելով Բաքվի հայկական ջարդերի մասին, ԵԽԽՎ-ում ադրբեջանական պատվիրակության անդամները սկսեցին ելույթներով «հարձակում» գործել Տաթևիկ Հարությունյանի նկատմամբ:
Տաթևիկ Հայրապետյանն իր ելույթում մասնավորապես հայտարարեց. «Ես ցանկանում եմ խոսել այն սարսափելի դեպքերի մասին, որոնք տեղի են ունեցել Ադրբեջանի մայրաքաղաք Բաքվում 1990 -ի հունվարին՝ 30 տարի առաջ: Այդ ջարդերը դեռևս 20-րդ դարից Ադրբեջանի կողմից հայկական բնակչության հանդեպ իրականացվող խտրական քաղաքականության շարունակությունն էին: Ջարդերի կազմակերպիչներն ու իրագործողները դեռ չեն կրել իրենց արժանի պատիժը, ահա թե ինչու Ադրբեջանը մինչ օրս շարունակում է իր խտրական և հակահայկական քաղաքականությունը, ինչի արտացոլումն են 2004թ. Հունգարիայում ՆԱՏՕ-ի կազմակերպած դասընթացների ընթացքում հայ սպա Գուրգեն Մարգարյանի՝ քնած ժամանակ կացնահարումը Ռամիլ Սաֆարովի կողմից, որը ներկայումս Ադրբեջանում հերոսացվել է, 2016թ. ապրիլի ընթացքում Թալիշ գյուղում խաղաղ բնակիչների խոշտանգումները և սպանությունը: Ամփոփելով ցանկանում եմ նշել, որ ԵԽԽՎ շատ անելիք ունի քսենոֆոբիայի և ատելության դեմ պայքարում: Բազմաթիվ հակամարտություններ կան Եվրոպայի Խորհրդի տարածքում, և ես հույս ունեմ դրանք բոլորը խաղաղ հանգուցալուծում կստանան, սակայն դրա կարևորագույն երաշխավորը մշտական պայքարն է և քննադատությունը խտրականության, ատելության և քսենոֆոբիայի դեմ»:
Ռաֆայել Հուսեյնովի նկարը՝ ԵԽ կայքից
Այս ելույթին հաջորդեց ԵԽԽՎ-ում ադրբեջանական պատվիրակության անդամ Ռաֆայել Հուսեյնովի ելույթը: Նա հայ գործընկերոջ ելույթը որակեց սուտ ու ատելության խոսք պարունակող:
Սամադ Սեիդովի նկարը՝ ԵԽ կայքից
ԵԽԽՎ-ում ադրբեջանական պատվիրակության ղեկավար Սամադ Սեիդովը ևս, արձագանքելով Տաթևիկ Հայրապետյանի ելույթին, հայտարարեց. «Ընդամենը մի քանի րոպե առաջ հայ գործընկերն իմ երկիրը հիշատակեց այս կազմակերպության համար շատ անընդունելի ձևով: Մի երկրի ներկայացուցիչ, որը շրջափակել է մյուսին և իրականացրել Խոջալուի ոճրագործությունը, չպետք է նման հայտարարություններով և ելույթներով հանդես գա»:
Կարդացեք նաև
Անդրադառնալով Ադրբեջանում նախընտրական առաքելության արդյունքներին՝ Սամադ Սեիդովն ասաց. «Իհարկե, զեկույցում հնչում է քննադատություն Ադրբեջանի հասցեին: Սակայն ուզում եմ նշել, որ զեկույցի հեղինակը՝ Թորհիլդուր Սունա Էվարսդոտիրն իր կարծիքն է հայտնել Վեհաժողովին ոչ ընդունելի ձևով: Ահա, թե ինչու ենք մենք գտնվում ճգնաժամի մեջ»:
Այնուհետև դիմելով հայ գործընկերոջն, ինչպես նաև զեկույցի հեղինակին՝ հայտարարեց, եթե այս կերպ շարունակեն, ապա ճգնաժամը ևս կշարունակվի:
Տաթև ՀԱՐՈՒԹՅՈՒՆՅԱՆ
Տաթևիկ Հայրապետյանի լուսանկարը՝ նրա ֆեյսբուքյան էջից
