Երեւանի ընդհանուր իրավասության դատարանն այսօր մերժեց Արթուր Այվազյանի`«Մանախի գործով» կրկնակի փորձաքննություն անցկացնելու`պաշտպանական կողմի միջնորդությունը:
Հիշեցնենք, Արթուր Այվազյանին մեղադրանք է առաջադրվել այն բանի համար, որ նա 31.03.2017թ ժամը 22:40-ի սահմաններում Անդրանիկի փող 53 շենքի բակում «անթաքույց արհամարհանք դրսևորելով հասարակության նկատմամբ, «ԵԼՔ» դաշինքի համակիր Հայկ Սարգսյանի նկատմամբ բռնություն գործադրելով` կոպիտ կերպով խախտել է հասարակական կարգը, որի ընթացքում պահել է ապօրինի ձեռք բերած գործարանային արտադրության 5,6մմ տրամաչափի օղակաձև բոցավառման որսորդական սպորտային ռազմամթերք հանդիսացող 7 փամփուշտներով լիցքավորված ինքնաշեն ակոսափող թմբուկավոր հրազեն հանդիսացող ատրճանակ»:
Այս գործով որպես վկա, հարցաքննվել է նաեւ վարչապետ Նիկոլ Փաշինյանը:
Արթուր Այվազյանի պաշտպան Հայկ Ալումյանը միջնորդել էր դատաբժշկական նոր փորձաքննություն անցկացնել, քանի որ, պաշտպանական կողմի կարծիքով, նախորդ դատաքննությունը ոչ բավարար է իրականացվել:
Կարդացեք նաև
Այլ մանրամասները`տեսանյութում
Մեղադրող կողմն առարկեց`բավականաչափ ժամանակ է անցել, այժմ հնարավոր չի լինելու իրական արդյունք ստանալ:
Դատավորը նույնպես այդ կարծիքին էր:
Մանրամասները`տեսանյութում
Հաջորդ նիստի կկայանա մարտի 19-ին, 17.30: Մեղադրանքի կողմն իր ճառը կասի:
Նիստի ավարտից հետո, Aravot.am-ի հետ զրույցում, Արթուր Այվազյանն ասաց`իր համար սպասելի էր, որ միջնորդությունը մերժվելու է. «Ուրիշ հարց պետք է առաջանա: Ինչի՞ ժամանակին պատշաճ փորձաքննություն չի կատարվել: Ինչի՞ց եք խուսափում, ինչի՞ չի լուծվել այս խնդիրը մինչեւ դատարան հասնելը, երբ նախաքննության ժամանակ երկու անգամ միջնորդել ենք, որ կրկնակի անեն: Ինտերնետում սաղ էդ նկարներն ա ֆռռում, սաղ տեսնում են, դուք չեք տեսնո՞ւմ: Ես չեմ նկարել, որ ասեք`մոնտաժել են, ոստիկանությունն է նկարել:
Էն ժամանակ վարչապետ չէր, ընդդիմադիր էր, սենց գնաց գործը, հիմա վարչապետ է` էլի սենց է գնում: Ես էս գործը գետին չեմ թողելու: Հո մենք չենք բողոքել, դուք էլ բողոքել`բերել… Ես մտածելու ընդհանրապես բան չունեմ, ես իմն ասել եմ»:
Նա տարակուսած է. «Չորրորդ տարին է՝ դատը գնում է, հլը ճակատի վերքի հարցն ե՞ք քննարկում»:
Ի դեպ, մեղադրանքը պաշտպանող դատախազն այս գործի նախաքննության ժամանակ վերահսկող դատախազն է եղել:
«Ուզում եմ հավատամ, որ խելքը գլխին վճիռ կլինի: Սպասում եմ»,- ասաց Արթուր Այվազյանը:
Նելլի ԳՐԻԳՈՐՅԱՆ
