Ճարտարագետն առաջարկում է պարզ լուծումներով մեր շրջապատն ու կենցաղը մանրէազերծել
Այս օրերին, երբ կորոնավիրուսը հասել է աշխարհի գրեթե բոլոր մայրցամաքներ եւ փոխանցվում է մարդուց մարդուն, կառավարություններն էլ վարակին հակազդելու մի շարք միջոցառումներ են իրականացնում, ՀՀ ԳԱԱ ֆիզիկայի կիրառական պրոբլեմների ինստիտուտի ավագ ճարտարագետ Վլադիմիր Եղոյանը մանրէներին, վիրուսներին ոչնչացնող մի պարզ մեթոդ է առաջարկում, որն աշխարհում կիրառվում է, սակայն Հայաստանում, հատկապես՝ կենցաղում՝ ոչ: Նրա խոսքով, հնարավոր է խուսափել նման կարգի վարակիչ մանրէներից, եթե օդը, միջավայրը, անկողնային պարագաները, երեխաների խաղալիքները հագուստները, տան այլ կենցաղային իրերը մանրէազերծես: Ճարտարագետի խոսքով, մեր երկրում անդրամանուշակագույն ճառագայթների օգտագործման մշակույթը չկա, մինչդեռ աշխարհի շատ երկրներում դրանք օգտագործում են կանխարգելիչ նպատակներով:
«Գոյություն ունեն բազմաբնույթ, տարբեր տեխնիկական բնութագրերով մանրէազերծող ճառագայթիչներ, որոնք նախատեսված են տարբեր կիրառությունների համար: Բակտերիցիդային ճառագայթիչների սերիայի շնորհիվ մանրէազերծվում են գորգերի, բազմոցների, վարագույրների, փափուկ ծածկույթով իրերի մակերեսները: Նման մակերեսների վրա կուտակվում են մեծ քանակությամբ վնասակար միկրոբներ, որոնցից ազատվելը գործնականում, ոչ միշտ է հնարավոր, ինչն էլ պատճառ է հանդիսանում տարբեր վարակիչ հիվանդությունների առաջացման եւ նրանց տարածման»,-«Առավոտի» հետ զրույցում ասում է Վլադիմիր Եղոյանը: Ճարտարագետ Եղոյանը կոնստրուկտիվ լուծումներով մի այնպիսի սարք է պատրաստել, որը թույլ է տալիս իրականացնել բակտերիցիդային ճառագայթների ներթափանցումը ծածկույթի ներքին շերտերը եւ, շնորհիվ ճառագայթների բարձր ինտենսիվության, բակտերիազերծումը կարելի է իրականացնել շատ կարճ ժամանակահատվածում:
Սարքի հեղինակը նշում է, որ այն պետք չէ թողնել առանց հսկողության եւ պետք է հեռու պահել երեխաներից՝ ինչպես օրինակ արդուկը: Սարքը նախատեսված չէ նաեւ տնային կենդանիներին մանրէազերծելու համար: Զգուշավորություն է պետք երեխաների ներկայությամբ օգտագործելիս: Ուղղակի կերպով չի կարելի նայել սարքի լուսավորությանը եւ այն չի կարելի ուղղել մարմնի այլ մասեր:
Կարդացեք նաև
Վլադիմիր Եղոյանի խոսքով, այդպիսի լամպեր Հայաստանում առկա են եւ իր հեղինակած սարքի կոնստրուկտիվ լուծումը թույլ է տալիս ճառագայթի ինտենսիվ թափանցումը դեպի ծածկույթի խորը շերտերը, որպեսզի շատ արագ ձեւով կարողանան վերացնել այդ մանրէները: Բացի այդ, նշյալ լուծումների շնորհիվ մանրէազերծելու ժամանակը մի քանի անգամ կրճատում է:
«Իմ կողմից ստեղծած սարքը թույլ է տալիս ձեւափոխել ճառագայթի տարածական բաշխումը: Այնպես՝ որ նա ուղղորդված լինի կոնկրետ ուղղությամբ եւ այդ ուղղությամբ էլ մի քանի անգամ բարձրացնում եմ ճառագայթի ինտենսիվությունը:Եվ այդ ինտենսիվության բարձրացման հաշվին ես կրճատում եմ այն ժամանակը, որ դուք պետք է ծախսեք այս կամ այն միջավայրը մանրէազերծելիս: Դա ստանալու համար պետք է որոշակի կոնստրուկտիվ փոփոխություններ կատարել, ինչն էլ իմ կողմից արվել է»:
Նրա խոսքով, օրինակ՝ սարքը շատ արդյունավետ է, հատկապես՝ երբ տանը փոքր երեխաներ կան. «Երեխան որ քնում է իր անկողնում, օրինակ՝ փռշտում է, բարձը, վերմակը բազմաթիվ մանրէներով է պատվում, դրանք մաքրելու համար սարքը պետք է սահուն կերպով մակերեւույթի վրայով անցկացնել եւ այդ միջավայրը կմանրէազերծվի: Եթե քո հագուստով մտնում ես բնակարան, հետդ բերում ես բազմաթիվ մանրէներ, մի ճառագայթով կարելի է դրանցից ազատվել: Լոգասենյակները, համակարգիչները, դռների բռնակները, գեղեցկության սրահներում օգտագործվող վարսահարդարման գործիքները եւ այլն, այդ բոլորը կարելի է այդ ճառագայթներով մանրէազերծել»:
Պարոն Եղոյանը հաշվարկել եւ պարզել է, որ այսպիսի արտադրություն սկսելու համար մեծ ներդրումներ անհրաժեշտ չեն, պարզապես պետք է լինի մի գործարար, որը ցանկություն կհայտնի համագործակցել եւ սարքի արտադրությունը սկսել, որը էականորեն կբարձրացնի միջավայրի նկատմամբ անվտանգությունը եւ մարդկանց կենցաղը կմաքրի ոչ պիտանի մանրէներից ու վիրուսներից:
«Կարիք չկա մեծ ներդրումներ կատարել, նոր սարքավորումներ ու նոր տեխնոլոգիական գծեր հիմնել, ինքը շատ պարզ լուծումներ ունի»,-ասաց մեր զրուցակիցը: Նրա խոսքով, սարքի առավելություններից մեկն էլ այն է, որ կարիքը չի լինի միջավայրը դեղորայքով ախտազերծել. «Այստեղ չկա ոչ մի քիմիա եւ ամբողջ առավելությունը նաեւ դրանում է»:
Լուսինե ԲՈՒԴԱՂՅԱՆ
«Առավոտ» օրաթերթ
18.03.2020
Միթե Կարելի է այսպիսի անհեթւթյւն գրել և տարածել։ Անցյալից դասեր չեք քաղել։ Հիշեք արմենիկւմը։ Վստահելի լրատվամիջոցին հարիր չէ։
Բակտերիցիդ նշանակում է հակաբակտերիալ կամ մանրէներին սպանող։ Վիրուսը բոլորովին այլ բան է, և այլ հետազոտություններում բազմիցս շեշտվել է, որ այդ բակտերիցիդ լամպերը արդյունավետ են մանրէների, բայց ոչ վիրուսների դեմ։ Լավ կլինի, որ նման հոդվածները հեղինակները նախապես խորհրդակցեն ոլորտի մասնագետների հետ։