Ռուսաստանի նախագահ Վլադիմիր Պուտինը ոչ աշխատանքային օրերը երկարաձգել է մինչև մայիսի 11-ը ներառյալ: Միևնույն ժամանակ ՌԴ նախագահը հրահանգել է, որպեսզի կառավարությունը մինչև մայիսի 5-ը ներկայացնի ինքնամեկուսացման ռեժիմից դուրս գալու փուլային ծրագիր, որում սահմանված չափանիշների հիման վրա շրջանների ղեկավարները մայիսի 12-ից կարող են կարանտինի ռեժիմը մեղմացնելու որոշում կայացնել: Այս մասին ՌԴ նախագահը հայտարարել է շրջանների ղեկավարների հետ առցանց ժողովի ժամանակ:
Պուտինը նաև ասել է, որ կորոնավիրուսի համավարակի պիկը դեռ չի անցել, երկիրն այժմ գտնվում է ամենալարված փուլում: ՌԴ նախագահը հրահանգել է պատրաստել տնտեսությանը և քաղաքացիներին աջակցող միջոցառումների փաթեթ, ինչպես նաև համավարակից հետո տնտեսությունը վերականգնելու մասշտաբային ծրագիր:
Նշենք, որ ապրիլի 28-ի դրությամբ Ռուսաստանում գրանցվել է կորոնավիրուսի հաստատված 93 հազար 558 դեպք, համաճարակի հետևանքով մահացել է 867 մարդ:
Պատրաստեց՝ Վիկտորյա ԱՆԴՐԵԱՍՅԱՆԸ
