«Ես չեմ տեսել Արմեն Բիլյանին կրակելուց ինչ-որ տեղ»,- ՊՊԾ գնդի գրավման գործով «Սասնա ծռերի» 10 անդամի գործով նիստին հայտարարեց «Սասնա ծռեր» խմբավորման անդամների դեմ ցուցմունք տված խմբավորման անդամ Էդգար Սողոմոնյանը:
Ինչպես արդեն տեղեկացրել ենք, մայիսի 27-ի ՊՊԾ գնդի գրավման գործով «Սասնա ծռերի» 10 անդամի գործով դատական նիստին (նախագահող դատավոր Մեսրոպ Մակյան) հարցաքննվեց «Սասնա ծռեր» խմբի անդամների դեմ ցուցմունք տված Էդգար Սողոմոնյանը:
Նա հրաժարվեց իր տված ցուցմունքից ու հայտարարեց. «Կարող եմ ասել այն մասին, որ նշանակվել է իմ գրավոր ցուցմունքի հետ կապված, որ ես տեսել եմ, թե Արմեն Բիլյանը կրակել է ինչ-որ տեղ. դա իմ բառերից չէ: Իմ տեսադաշտը փակ է եղել, ես նրան կրակելուց չեմ տեսել, ոչ տեսել եմ զենքով: Այդ ժամանակ ես ոչ մեկին չեմ ճանաչել, ունեցել եմ տեսողության խնդիր: Այդ ամենը իմ բառերից չէ, շարադրել են այնպես, ինչպես քննչականում են ուզել: Իրենց մտքերով շարադրվել է և բերել գրել են իմ անունից: Ի զորու չեմ եղել այդ պահին ինչ-որ բանի համար կոնֆլիկտի մեջ մտնել նրանց հետ: Ես ոչ մեկին չեմ տեսել կրակելուց, Արմեն Բիլյանին չեմ տեսել կրակելուց»:
Էդգար Սողոմոնյանն ասաց, որ իրենից ցանկացել են ցուցմունք կորզել ու վստահեցրեց. «Ես իրականում ոչ ծառայել եմ, ոչ զենքից գաղափար ունեմ, ոչ էլ կարող եմ նկարագրել նման մի բան. դրանք իմ բառերից չեն: Ես այդքան գաղափար չունեմ: Թող ինձնով ոչինչ առաջ չտանեն: Ես հրաժարվում եմ այդ բոլոր ցուցմունքներից»:
Կարդացեք նաև
Տաթև ՀԱՐՈՒԹՅՈՒՆՅԱՆ
