Ինչքա՞ն է տեւելու հրադադարը, կա՞ կոնկրետ պայմանավորվածություն: Այս հարցերն էին այսօր ուղղում ՊՆ ներկայացուցիչ Արծրուն Հովհաննիսյանին: Նա քիչ առաջ հրավիրված ասուլիսում պատասխանեց, որ դրա մասին կհայտարարվի, չի կարող ասել. «Ես չունեմ այդպիսի տեղեկություն»:
Արծրուն Հովհաննիսյանը խնդրեց դիրքային փոփոխությունների մասին հարցեր չբարձրացնել մամուլի ասուլիսների ժամանակ, քանի որ պատերազմը դեռ չի ավարտվել:
Արծրուն Հովհաննիսյանը նաեւ տեղեկացրեց, որ Սյունիքում հիմա նորմալ իրավիճակ է, որեւէ մարտական գործողություն չկա. «Մեր զոհվածների մասին տեղեկությունները թարմացվում են, եւ հրադադարը եւս մի հնարավորություն է, որ ավելի ստույգ տվյալներ ներկայացվեն»:
Հարցին՝ ադրբեջանական կողմը ջանքեր չի խնայում՝ ցույց տալու, թե իբր հայկական կողմն է խախտել հրադադարը, միջազգային հանրության համար ունե՞ք այս սուտը հերքող փաստեր՝ Արծրուն Հովհաննիսյանը պատասխանեց. «Միշտ չի, որ պետք է ինչ-որ բան հերքենք, կամ հավաստենք, կամ ջանք գործադրենք՝ ինչ-որ բան ապացուցելու համար: Իսկ այլ ի՞նչ էինք սպասում մենք ադրբեջանական կողմից, ես այլ բան չէի սպասում»:
Հռիփսիմե ՋԵԲԵՋՅԱՆ
