«Մարդու իրավունքներն անօտարելի են՝ անկախ նրանից, թե մարդը որտեղ է ապրում, ճանաչված երկրում է ապրում, թե ոչ: ՄԱԿ-ն ինքն ունի մեխանիզմներ, որոնք արձագանքում են տարբեր պետություններում մարդու իրավունքների խախտումները:
Եթե չճանաչված պետությունների մասին ենք խոսում, ապա, օրինակ, Պաղեստինի հարցերը քննող հանձնակատար գոյություն ունի, որի մանդատն է հետեւել մարդու իրավունքների պաշտպանությանը, քննել դեպքերը: Սա հստակ օրինակ է ճանաչված-չճանաչված լինելու հարցի վերաբերյալ»,-«Մեդիա կենտրոն»-ի կազմակերպած առցանց քննարկման ժամանակ այսօր անդրադառնալով Արցախի դեմ Ադրբեջանի եւ Թուրքիայի լայնածավալ ռազմական ագրեսիայի հանդեպ միջազգային կառույցների անտարբերության փաստին՝ ասաց «Մարդու իրավունքների հետազոտությունների կենտրոնի» տնօրեն Անահիտ Սիմոնյանը:
Ընտրովի՞ հումանիզմ, ակնկալիքները միջազգային կառույցներից
Կարդացեք նաև
Առցանց քննարկում «Ընտրովի՞ հումանիզմ, ակնկալիքները միջազգային կառույցներից» թեմայով։ Բանախոսներ՝ – Սոնա Այվազյան, Թրանսփարենսի Ինթերնեշնլ հակակոռուպցիոն կենտրոնի գործադիր տնօրեն,- Արթուր Սաքունց, Հելսինկյան քաղաքացիական ասամբլեայի Վանաձորի գրասենյակի ղեկավար,- Անահիտ Սիմոնյան, Մարդու իրավունքների հետազոտությունների կենտրոնի տնօրեն:
Gepostet von Media Center/Մեդիա կենտրոն am Samstag, 17. Oktober 2020
Նրա խոսքով՝ հայաստանյան քաղհասարակության դժգոհությունն ուղղված է ՄԱԿ-ի հայաստանյան գրասենյակին, որը երկար տարիներ գործում է ՀՀ-ում եւ ունի հստակ մանդատ. «Խաղաղ ժամանակ գրասենյակն անդրադառնում է մարդու իրավունքների բազմաթիվ խնդիրներին, գործակցում քաղհասարակության հետ, եւ ինձ համար խնդրահարույց է հետեւյալը. երբ կան մարդու իրավունքների ոտնահարման բազմաթիվ փաստեր, վտանգներ, հումանիտար աղետի իրական սպառնալիք, գործակցությունը եւ արձագանքը զրոյի է հասցվել: ՄԱԿ-ը չի կարող ունենալ չեզոքություն, որը մանդատի սկզբունք է, օրինակ, միջազգային Կարմիր խաչի համար: ՄԱԿ-ի դեպքում չկա իրավական դրույթ, որում արձանագրված է այդ կառույցի չեզոքությունը: Ուստի մեր պահանջը բարի կամքի դրսեւորում չէ, այլ կառույցի պարտավորությունն է»:
Անահիտ Սիմոնյանի խոսքով՝ Ալիեւյան ռեժիմի գործողությունների հանդեպ միջազգային իրավաքաղաքական ճնշում չգործադրվեց հումանիտար հրադադարի խախտումից հետո. «Սա լուրջ, խայտառակ իրավիճակ է, երբ օրեր շարունակ նայում ես, որ հումանիտար գործողությունները չեն իրականացվում: Հումանիտար աղետն այս պահի դրությամբ իրական վտանգ է: Չկա որեւէ ալգելք, որով ՄԱԿ-ը կարող չմիջամտել իրավիճակին»:
Հիշեցնենք, որ սեպտեմբերի 27-ից Ադրբեջանը Թուրքիայի անմիջական մասնակցությամբ եւ աջակցությամբ ռազմական լայնածավալ ագրեսիա է իրականացնում Արցախի դեմ:
Լուիզա ՍՈՒՔԻԱՍՅԱՆ
