Կարեն Դեմիրճյանի տիկին Ռիմա Դեմիրճյանը այսօր՝ հոկտեմբերի 27-ին, այցելել էր ամուսնու շիրիմին։
Նա լրագրողների հետ զրույցում ասաց․ «Շատ հակասող մտքեր են ինձ այսօր պատում, իրարամերժ։ Մի կողմից մի հրեշավոր միտք է ծագում՝ ասում եմ՝ ի՜նչ լավ է, որ գնաց չտեսավ, չտեսավ՝ իր սիրած Հայաստանը ինչ օրի է։ Լավ է, բայց մյուս կողմից մերժում եմ այս միտքը, ասում եմ՝ նա, որ լիներ, կաներ ամեն ինչ, որ այս իրավիճակը չստեղծվեր։ Նա կարողանում էր ինչ-որ հրաշքով լուծումներ գտնել այնտեղ, որտեղ թվում էր, թե լուծում չկա։ Իսկ եթե այնուամենայնիվ, անկախ իրենից, զարգացումները գնային, նա, իհարկե՛, շատ մեծ ապրումներ կունենար, դժվար կացություն, բայց նա գիտեր իրեն հավաքել դժվար պահերին՝ ինչքան էլ ծանր լինի։ Ժողովրդին հույս կներշնչեր, նա կասեր՝ հավաքենք մեզ, անկոտրում մնանք, ամեն ինչ անենք, որպեսզի օգնենք մեր տղաներին, մեր զավակներին։ Ամեն ինչ անենք, որ պատվով դուրս գանք այս վիճակից։ Եվ իրոք, ամեն ինչ կաներ, ավել ասել չեմ կարող։ Նա պետք է լիներ, բայց հիմա ավելի պարզ է երևում՝ որտեղի՞ց է գալիս սպանությունը։ Մի՛ փնտրեք ներսում, հայերի ձեռքերով են արել, բայց գլուխը հեռու է։ Պլաններին խանգարում էր։ Նա էլ, Վազգենն էլ»։
Հարցին, թե տեսնո՞ւմ է Հոկտեմբերի 27-ի գործի վերաբացում, Ռիմա Դեմիրճյանն ասաց, որ իրեն արդեն չի հետաքրքրում․ «Նախ, չեմ հավատում, որ կվերաբացվի, ես վաղուց եմ ասել։ Դա շատ հմտորեն է արված։ Կատարողները սոսկ կատարողներ են եղել։ Այդ լակոտներին, այդ ստորներին ո՞վ էր բացատրում, թե ինչ պիտի անեն։ Նրանց թույլ կողմերի վրա խաղացել են՝ ինքնասիրահարվածության և այլնի և օգտագործել են։ Մենք չենք կարող ասել՝ բռնել ենք, կան, պետք է ապացուցվի։ Նրանք այն մարդիկ չեն»։
Կարդացեք նաև
Ամի ՉԻՉԱԿՅԱՆ
