ՀՀ վարչապետ Նիկոլ Փաշինյանի արտաքին քաղաքական հարցերով նախկին խորհրդական Արսեն Խառատյանը ֆեյսբուքյան իր էջում գրել է. «ԱՄՆ-ի նախագահական ընտրությունների ձայների հաշվարկն է: Այս պահին պատկերը նույնական է 2016-ի հետ: Այսինքն, այն նահանգներում որտեղ հաղթել էին դեմոկրատներն ու հանրապետականները, քվեարկել են նույն կերպ:
Առաջիկա ժամերին մի քանի անկյունաքարային նահանգներում պատկերը կհստակեցվի: Մասնավորապես, եթե անսպասելի արդյունքներ չլինեն Փենսիլվանիա, Միչիգան, Օհայո, Ֆլորիդա, Հյուսիսային Կարոլինա եւ Նեւադա նահանգներում, ապա Բայդենի շանսերը մեծ չեն:
Ձայների հաշվարկը տարբեր նահանգներում տարբեր փուլերում է: Կենտրոնական եւ արեւելյան նահանգներում ձայների 50-ից 80%-ը հաշվել են, արեւմտյան ափին տեղեր կան, որ նոր են սկսում:
Երկար ու անկանխատեսելի գիշեր է սպասվում, դե բայց ըսոր Ամերիկա կըսեն, ամեն ինչ հնարավոր է»:
Կարդացեք նաև
Ավելի վաղ Արսեն Խառատյանը գրել էր. «Ամերիկյան Կոնգրեսում դեմոկրատները մեծամասնություն կունենան:
ԱՄՆ-ի Կոնգրեսի ներկայացուցիչների պալատն առաջիկա երկու տարիներին կրկին դեմոկրատներինը կլինի, Սենատի ու նախագահական ընտրությունների վիճակը` պարզ կլինի առաջիկա ժամերին:
Ամեն դեպքում, դեմոկրատական մեծամասնությամբ Կոնգրեսում հայերի ընկերների պակաս չկա, իսկ որոշ հայտնի կոնգրեսականներ կարող են անկյունաքարային պաշտոններ ստանալ»:
