«Հանրային հեռուստաընկերության» եթերում Պետրոս Ղազարյանի հետ զրույցում այսօր վերջինս վարչապետ Նիկոլ Փաշինյանից հետաքրքրվեց՝ «քաղաքական առումով ձեր ընդդիմախոսներն ասում են, որ դուք չկարողացաք Ռուսաստանի հետ ապահովել պատշաճ հարաբերություններ, ավելին՝ ձեր իշխանությանը ՌԴ-ում ընդունում են որպես հակառուսական եւ արեւմտամետ, եւ եթե լիներ այլ իշխանություն, Ռուսաստանն այլ որակի եւ արագության օգնություն ցույց կտար»:
Նիկոլ Փաշինյանը նախ նշեց. «Մենք խոսում ենք Արցախի հարցում դիրքորոշման մասին: Եւ պետք է հստակ արձանագրել եւ վստահաբար ասել, որ Արցախի հարցում ՌԴ դիրքորոշումը վերջին 4,5 տարում փոփոխություն չի կրել: Այսօր ՌԴ դիրքորոշումն Արցախի հարցի վերաբերյալ այնպիսին է, ինչպիսին եղել է 4,5 տարի առաջ: Այսօրվա իրողություններում կա նաեւ այդ պատկերացումներին համապատասխան իրողություն, մասնավորապես՝ ռուս խաղաղապահների ներկայություն: Մենք չենք խոսում ՀՀ-ի եւ ՌԴ-ի իշխանության միջեւ հարաբերությունների մասին, այլ ԼՂ հարցում ՌԴ դիրքորոշման մասին»:
-Դրանք երբեւէ չե՞ն կապակցվում:
-Այս պարագայում կարող ենք միանշանակ համոզված լինել, որ ոչ: Որովհետեւ եթե կապակցված լինեին, 2018 մայիսից հետո այդ դիրքորոշումը փոփոխություն կկրեր: Մյուս կողմից կարող եմ ասել, որ ՀՀ եւ ՌԴ-ի իշխանությունների միջեւ եղել են եւ կլինեն նորմալ աշխատանքային հարաբերություններ:
Կարդացեք նաև
-Այս ընթացքում շփումներ եք ունեցել Ռուսաստանի նախագահի հետ: Ինչպիսի՞ն են ձեր հարաբերությունները:
-Աշխատանքային, շատ լավ:
Լուիզա ՍՈՒՔԻԱՍՅԱՆ
