«Խիստ դատապարտելի է բոլոր նրանց արարքը, ովքեր նույնիսկ այս պահին են փորձում մարդկանց դժբախտությունն անտեսել եւ անգամ այս իրավիճակում օգուտ քաղել։ Եթե որեւէ հայ մարդ համարձակվել է գնալ Արցախ եւ հայի տուն թալանել, անաստված մեկը պիտի լինի»,– Aravot.am-ի հետ ունեցած հեռախոսազրույցում ասաց Գորիսի քաղաքապետի տեղակալ Իրինա Յոլյանը։ Նշենք, որ 168․am–ի հրապարակման մեջ բերձորցի Լիլիթ Խաչատրյանն ահազանգել էր, որ գորիսեցիները թալանում են Բերձորի տները։
Իրինա Յոլյանը ցավով է կարդացել այդ ահազանգը։ «Ինչ խոսք, որեւէ մեկի նման արարքը ներում չունի, բայց գորիսեցիներն այն մարդիկ են, ովքեր պատերազմի առաջին օրվանից 10000–ից ավելի արցախցի են հյուրընկալել ու մինչ օրս սիրով ու պատասխանատվությամբ հոգում են հազարավոր ընտանիքների կարիքները»,–նշեց փոխքաղաքապետը։ Նրա խոսքով, ամբողջ համայնքապետարանը այլ կառույցների հետ միասին, անգամ գիշերն աշխատում է, որպեսզի հյուրընկալված ընտանիքների խնդիրները լուծվեն։
Հնարավորինս ամեն ինչ արվում է, որպեսզի այս դժվարին օրերին Գորիսում գտնվող արցախցիները հոգատար ու ապահով միջավայրում լինեն, եւ ըստ Իրինա Յոլյանի՝ իրենց հաջողվել է։ Գորիսի բոլոր հյուրանոցներն այս օրերին արցախցիների համար անվճար են աշխատում, հացի փռերն են անվճար հաց ապահովում եւ պատերազմի օրերին 24 ժամ աշխատել են, որպեսզի նաեւ Ստեփանակերտին հաց մատակարարեն։
«Խնդրանքս` այս ամենի ֆոնին որեւէ նվիրված ու սրտացավ գորիսեցու արածը ջուրը չլցնել, եթե անգամ մեկ անհատական դեպքի եք ականատես եղել՝ դա Գորիսը չէ։ Սեպտեմբերի 27-ից մինչ օրս Գորիսը Արցախի թիկունքն ամուր է պահել եւ հիմա էլ նվիրումով կանգնած է։ Իսկ նրանք, ովքեր իրենց խիղճն են կորցրել բոլորիս համար այս ծանր օրերին, հույս ունեմ՝ արժանի պատիժը կստանան»,–վերջում ասաց Իրինա Յոլյանը։
Կարդացեք նաև
Ի դեպ, ըստ մեր զրուցակցի ունեցած տեղեկությունների, մինչեւ այս պահը թե՛ Գորիսի, թե՛ Քաշաթաղի ոստիկանական բաժանմունքներում գողությունների մասին ոչ մի պաշտոնական ահազանգ կամ դեպք չի արձանագրվել։
Արմեն ԴԱՎԹՅԱՆ
