Արցախի խորհրդարանում այսօր կառավարության հետ տեղի ունեցած հարց ու պատասխանի ժամանակ «Միասնական հայրենիք» խմբակցության պատգամավոր, Արցախի ԱԺ նախագահի տեղակալ Գագիկ Բաղունցը հետաքրքրվեց՝ Արցախի կառավարությունն ի՞նչ է անում մոտ 30 հազար արցախցիներին հայրենիք վերադարձնելու ուղղությամբ: Ըստ նրա, պատերազմի օրերին Արցախից գնացել են 90 հազարին մոտ քաղաքացիներ, սակայն վերադարձել են 53 հազար, կա լուրջ մտավախություն, որ այդ 35 հազարը առաջին հնարավորության դեպքում կլքեն Հայաստանը:
Արցախի աշխատանքի եւ սոցիալական հարցերի նախարար Մանե Թանդիլյանն ասաց, որ հնչեցված տվյալները, հավանաբար, Ռուսաստանի պաշտպանության նախարարության տվյալներ են, սակայն ստուգ տվյալն այլ է: Ըստ տիկին Թանդիլյանի, 100 հազար մարդ վերադարձել է Արցախ: Այս տվյալները, տիկին Թանդիլյանի խոսքով, հիմնված են ֆինանսական աջակցության տվյալների հիման վրա. «Այսինքն՝ այստեղից ֆինանսական աջակցություն ստացող անձանց թիվը մի քանի անգամ գերազանցում է հրապարակված տվյալներին: Նրանք եկել են սեփական ավտոմեքենաներով, տարբեր միջոցներով, որը չի արձանագրվում այդ տվյալների մեջ: Ասեմ ավելին, գալիք 2 ամսվա ընթացքում մենք ընտանիքի կարիքների գնահատման ամբողջական միջոցառում ենք իրականացնելու, որով արձանագրելու ենք Արցախում ապրող բոլոր ընտանիքների կազմը եւ թվաքանակը, որը ավելի ստույգ հնարավորություն կտա ճշգրիտ թվեր հնչեցնելու»:
Մանե Թանդիլյանը նաեւ ասաց, որ այս պահին Արցախից Հայաստանում գտնվում է մոտ 40 հազար բնակիչ, որոնք Ադրբեջանի տիրապետության տակ անցած տարածքների բնակիչներն են: Սակայն տեղահանված բնակիչների երեսուն տոկոսը արդեն վերադարձել են:
Կարդացեք նաև
Լուսինե ԲՈՒԴԱՂՅԱՆ
