ՀՀ Ազգային Ժողովի 2021 թվականի գնումների պլանում բավականին ուշագրավ ծախսեր են նախատեսված։
ԱԺ-ն որոշել է այս տարի որոշ շենքերի եւ շինությունները կապիտալ վերանորոգել, նոր գորգեր, համակարգիչներ, հեռուստացույցներ, աթոռներ եւ բազկաթոռներ ձեռք բերել։
Օրինակ՝ շենք-շինությունների կապիտալ վերանորոգման համար ԱԺ գնումների պլանում նախատեսվում է 47 միլիոն 153 հազար դրամի ծախս։ 59 միլիոն 425 հազար դրամ էլ նախատեսել է ծախսել ընթացիկ նորոգման համար։ 5 միլիոն 500 հազար դրամ էլ կծախսի 550 կիլոգրամ շինարարական նյութեր ձեռք բերելու համար։
ԱԺ-ի համար 750 քմ ուղեգորգերն, այսպես ասած՝ հարկատուների վրա կնստի 10 միլիոն 875 հազար դրամ, իսկ 60 հատ աթոռը՝ 900 հազար դրամ, 6 միլիոն 500 հազար դրամի ծախս էլ նախատեսվել է 100 հատ բազկաթոռների համար։ Մեկ այլ գնումով էլ ձեռք կբերվի եւս 25 հատ բազկաթոռ, որի ընդհանուր արժեքը 6 միլիոն 250 հազար դրամ է։
Կարդացեք նաև
ԱԺ-ն միայն 100 միլիոն 800 հազար դրամ է նախատեսել ծախսել 240 հատ սեղանի համակարգիչներ ձեռք բերելու համար։
Նույն գնումների պլանում 7 հատ էլ հեռուստացույց պետք է գնվի, որի ընդհանուր արժեքը կազմում է 1 միլիոն 750 հազար դրամ, 5 հատ էլ կենցաղային սառնարաններ, որոնց ընդհանուր արժեքը 750 հազար դրամ է։
ԱԺ-ի այս տարվա ներկայացուցչական ծախսերը գնումների պլանով կազմում է 195 միլիոն դրամ։
ԱԺ-ն 14 միլիոն 300 հազար դրամ նախատեսել է ծախսել ավտոմեքենաների վերանորոգման ծառայության համար։ ԱԺ-ի գնման պլանում նախատեսված է 2 միլիոն դրամ էլ պետական գնում կատարել մեկ անձից գնման ընթացակարգով՝ նույն ծառայության համար՝ ավտոմեքենաների վերանորոգում, որի միավորի գինը նշված է 1 միլիոն 300 հազար դրամ։
ԱԺ ծառայողական մեքենաների վառելիքի ծախսն էլ ահագին է, այս տարի գնումների պլանում ԱԺ-ն նախատեսել է ռեգուլյար տեսակի բենզին գնել մի դեպքում 34 միլիոն 560 հազար դրամ ընդհանուր գումարով 120 հազար լիտրի համար։Այսինքն, 1 լիտրի արժեքը կազմում 288 դրամ։ Իսկ ահա մեկ այլ նախատեսված գնումով 33384 լիտր ռեգուլյար բենզինի ընդհանուր ծախսը 13 միլիոն 320 հազար 216 դրամ է, այսինքն՝ 1 լիտր ռեգուլյար տեսակի բենզինի գինը 399 դրամով են հաշվարկելու։ Սուպեր տեսակի 2980 լիտր բենզինի համար ԱԺ-ն նախատեսում է ծախսել 1 միլիոն 519 հազար 800 դրամ։ Այսինքն, 1 լիտրի արժեքը հաշվարկում են 510 դրամով։ Մեկ այլ գնումով էլ 16000 լիտր սուպեր տեսակի բենզինի համար կծախսեն 6 միլիոն 640 հազար դրամ, 1 լիտրի արժեքը կազմում է 415 դրամ։ Նշենք, որ շուկայում գոնե այս պահին սուպեր տեսակի բենզինը 510 դրամից ցածր է։
ԱԺ գնումների պլանում նախատեսված է 700 հատ բացիկ գնել, որի համար կծախսեն 1 միլիոն 400 հազար դրամ։ Բջջային հեռախոսների ծառայությունների գնման համար նախատեսված է 6,5 միլիոն դրամ։
ԱԺ-ում գրասենյակների մաքրման ծառայությունների համար գնումների պլանում նախատեսված է 76 միլիոն 997 հազար դրամ։
Ազգային ժողովը նախատեսել է երկու տեսակի՝ թանկ եւ էժան զուգարանի թուղթ գնել։ Օրինակ՝ 2600 հատ զուգարանի թղթի համալիր գնումների պլանում նախատեսվել է 1 միլիոն 499 հազար 992 դրամ, այսինքն՝ մեկ զուգարանի թղթի արժեքը հաշվարկել են 576 դրամ։ Սակայն, կարելի է ենթադրել, չնայած որ գնումների կայքում նշված է հատ, բայց այս դեպքում զուգարանի թղթի տուփի արժեքն է 576 դրամ։ Մեկ այլ նախատեսված գնումով էլ ԱԺ-ն հատը 96 դրամով 1900 հատ զուգարանի թուղթ է գնելու, ընդհանուր 182 հազար 400 դրամով։ Փաստորեն բնական կարիքները հոգալու դեպքում էլ է իշխանությունը «սեւերի եւ սպիտակների բաժանել», թե չէ, զուգարանի թուղթ է էլի, բոլորի համար էլ նույնը գնեք։
Այս տարի ԱԺ-ն 4 հատ նոր զուգարանակոնք կունենա, որոնց ընդհանուր արժեքը 200 հազար դրամ է։
«Զանազան պահեստամասեր» տողով ԱԺ-ն կծախսի 10 միլիոն 340 հազար դրամ։ Բանավոր թարգմանության ծառայությունների համար ԱԺ-ն նախատեսել է ծախսել 6 միլիոն 641 հազար դրամ, իսկ գրավոր թարգմանության համար՝ 1 միլիոն դրամ։
13 միլիոն դրամ էլ նախատեսված է աուդիտորական ծառայությունների համար։ Մի ուշագրավ գնում էլ կա՝ արհեստական կաշի, 330 հազար դրամ, 66 քմ։ Սրանք, իհարկե, ԱԺ-ի գնումների պլանի մի փոքր մասն են, բայց ներկայացրել ենք հիմնականում խոշոր եւ ուշագրավ ծախսերը։
Նշենք, որ պետական այս գնումների մեծ մասը նախատեսված է գնանշման հարցում ընթացակարգով։ Ինչը նշանակում է, մրցույթի անցկացման ժամկետներն ավելի քիչ են, քան բաց մրցույթի դեպքում է լինում։ Գնանշման հարցման ընթացակարգի կիրառման դեպքում հայտերի ներկայացման համար նախատեսվող ժամկետն առնվազն չորս աշխատանքային օր է, այս ընթացակարգով գնումները նախատեսված են մինչեւ 70 միլիոն դրամի դեպքում։
Նելլի ԲԱԲԱՅԱՆ
