«Զանգակ» գրատանը կայացավ ԵՊՀ դասախոս, սոցիոլոգ, Մարքեթինգային հաղորդակցությունների առաջատար մասնագետ Լիլիթ Շաքարյանի «Բրենդի կառավարում» բրենդինգի ոլորտում առաջին հայալեզու մասնագիտական գրքի շնորհանդեսը:
Ինչպես նշեց հեղինակը, գրքում ներկայացվում են բրենդ հայեցակարգի առանցքային յուրահատկություններն ու կառուցվածքը, ծագման պատմական նախադրյալներն ու զարգացման ընթացքը, ինչպես նաև բրենդի ճարտարապետության կառուցման տեխնոլոգիաներն ու կառավարման ուղիները: Նա ներկայացրեց, թե ինչ դիտանկյունից են վերլուծվել են բրենդ-ինքնության հիմնական կառուցվածքային բաղադրիչները.
Լիլիթ Շաքարյանը նշեց, թե ինչպես է ծնվել գիրքը, հավելեց, որ գրքի շապիկին ԴՆԹ գունագեղ շղթայի պատկերումն էլ պատահականություն չէ. «Դա տարբերակման կոդն է, եթե ընկերություն է, դա ընկերության տարբերակման կոդն է, պետություն է` պետության տարբերակման կոդը…Այն պետք է լինի այնքան յուրահատուկ եւ անկրկնելի, որքան ԴՆԹ շղթան է…Սա է գրքի ստեղծման առանցքային գաղափարը»:
Կարդացեք նաև
Լիլիթ Շաքարյանն ընդգծեց, որ ցանկացել է մնալ գիտության ոլորտում, որովհետեւ այդպիսով ցանկացել է շարունակել գիտնական պապի` Հրաչիկ Շաքարյանի ազգանունը: Նա առանձնահատուկ շնորհակալություն հայտնեց գրքի խմբագիր Նոյեմի Անդրեասյանին եւ ամուսնուն` էդգար Այվազյանին:
ԵՊՀ սոցիոլոգիայի ֆակուլտետի կիրառական սոցիոլոգիայի ամբիոնի վարիչ Արթուր Աթանեսյանը կարեւորեց գրքի ծնունդը Ասաց, որ Լիլիթի պապիկն իր դասախոսն է եղել եւ այժմ Լիլիթն է համալսարանական ընտանիքի յուրահատուկ անդամ. «Ինքն էլ է բրենդ»:
ԵՊՀ Սոցիալական աշխատանքի և սոցիալական տեխնոլոգիաների ամբիոնի դոցենտ Նվարդ Մելքոնյանը նշեց, որ Լիլիթը սիրված դասախոս է, լավագույն մասնագետներից մեկը, իսկ գիրքը` սպասված եւ արժեքավոր:
Հավելենք, որ Լիլիթ Շաքարյանը 2009թ-ից ԵՊՀ Սոցիոլոգիայի ֆակուլտետի, Սոցիալական աշխատանք և սոցիալական տեխնոլոգիաներ ամբիոնի դասախոս է, Բրենդինգի հիմունքներ, ԶԼՄ սոցիոլոգիա, Ժամանակակից PR տեխնոլոգիաներ դասընթացների առաջին նախաձեռնողը, մշակողն ու դասավանդողը, մի շարք գիտական հոդվածների հեղինակ: Նա նաեւ իր ուրույն ներդրումն ունի մի քանի առաջատար հայրենական արտադրողների բրենդի ճիշտ դիրքավորման և յուրահատուկ բրենդ-իմիջի ձևավորման գործընթացում։
Գոհար ՀԱԿՈԲՅԱՆ
