ԲՀԿ առաջնորդ Գագիկ Ծառուկյանի որդու՝ Նվեր Ծառուկյանի շքեղ հարսանիքը սոցցանցերում դարձել է բուռն քննարկման թեմա: Օգտատերերը քննարկում են հրապարակի տոնածառից մեծ հարսանեկան տորթը, կապում այն ձվի դեֆիցիտի հետ, քննարկում են տարոսիկների վարկածները, իսկ հումորային մեկնաբանություններից դուրս՝ հիմնականում ընդգծում են այն խորը հակասությունը, թե ինչպե՞ս կարելի է հայրենիքի այս ճգնաժամային շրջանում, երբ հազարավոր սգացող մայրեր կան, մոտ մեկ ժամանոց հրավառություն անի «Հայրենիքի փրկության շարժման» անդամներից մեկը:
Այս առնչությամբ այսօր, այսպես ասած, «հարսնքավորներից» մեկը՝ ԲՀԿ պատգամավոր Միքայել Մելքումյանը մեր հարցին ի պատասխան՝ թե «դարի հարսանիքի» այդ դիտողությունները, քննադատությունները տեղի՞ն չէին՝ ասաց. «Ինքը անձնական խնդիր է, անձական միջոցառում է: Կենտրոնանալ ընտանիքի, մարդու անձնական միջոցառման վրա եւ դա սարքել չգիտեմ ինչ՝ ավելի լավ է մեր ազգը կենտրոնանա այն խնդիրների վրա, որոնք համազգային բնույթ ունեն: Ոչ թե ինֆորմացիոն տարբեր ցանցերում թիթեռնիկի կյանք ունեցող բաներ քննարկեն, մի քանի օր հետո այլ հարցեր կառաջանան: Ես կարծում եմ՝ սա անձնական է, նախընտրական բնույթ ունի: Այլ պարագայում կարող է ոչ էլ կենտրոնանային սրա վրա: Եթե չլիներ այսպիսի նախընտրական փուլ, որը մոտենում է, միգուցե այսպիսի արձագանք չլիներ, ընկալվեր սովորական, ոնց կա»:
Մելքումյանն ասաց, որ քննադատություններն ու այդօրինակ մեկնաբանությունները տեղին չեն. «Պետք չի շատ մտասեւեռվել, կենտրոնանալ: Միգուցե ԲՀԿ-ն հայտ է ներկայացրել, որ ինքը գնում է լայն թափով ընտրությունների, դրա համար է»: Դիտարկմանը, որ ձեր շարքերից էլ են ձեզ քննադատում՝ Մելքումյանն ասաց, որ նրանք մրցակիցներ են:
Կարդացեք նաև
Մեր հարցին՝ այս աղքատ երկրում նախ այդ աստիճան շքեղությունը ո՞նց եք գնահատում, ո՞նց կարելի է այդքան հարստանալ այս աղքատ երկրում՝ Մելքումյանը պատասխանեց. «Ես արդեն ասացի»:
Մեր դիտարկմանը՝ ասում եք՝ համազգային խնդիրների մասին թող խոսեն, բայց դա հենց ընկալվում է նման խնդիր, որ բանակի հաշվին է դա եղել՝ Մելքումյանը պատասխանեց. «Ես այդպես չեմ ընկալում: Բոլորը, ինչ Ծառուկյանն արել է ե՛ւ բանակի համար, ե՛ւ բանակի ենթակառուցվածքներ եւ այլն, այնքան է, որ չի կարելի համադրել այն, ինչ դուք ասում եք»:
Հռիփսիմե ՋԵԲԵՋՅԱՆ
