ՀՀ ՊՆ ռազմական ոստիկանությունում օպերատիվ տվյալներ էին ստացվել, որ ՀՀ ԶՈՒ զինծառայողը, համացանցի միջոցով ծանոթանալով կին օգտատերերի հետ, տարբեր պատրվակներով նրանցից գումար է շորթում: ՀՀ ՊՆ ռազմական ոստիկանության քրեական հետախուզության բաժնի աշխատակիցների կողմից ս/թ մայիսի 3-ին իրացնելով ստացված օպերատիվ տվյալները պարզվել է, որ ՀՀ ՊՆ ռազմական ոստիկանության աշխատակից կրտսեր սերժանտ Ա.Տ.-ն «Facebook» սոցիալական կայքի միջոցով այլ օգտատիրոջ անվան տակ 2020թ-ի մարտ-ապրիլ ամիսներին ծանոթացել է քաղաքացի Ա.Ա.-ի հետ՝ ներկայանալով որպես Հայաստանի Հանրապետության մարզերից մեկում գտնվող բուժհաստատության բժիշկ, վստահությունը չարաշահելու եղանակով, տարբեր պատրվակներով քաղաքացի Ա.Ա.-ից 2020թ-ի ապրիլ ամսին ստացել է ընդհանուր 100.000 ՀՀ դրամ գումար:
Կասկածներ կան, որ կրտսեր սերժանտ Ա.Տ.-ին նման եղանակով հնարավոր է գումարներ փոխանցած լինեն նաև այլ օգտատերեր: Նման քաղաքացիներին խնդրում ենք դիմել ՀՀ ՊՆ ռազմական ոստիկանություն:
Փաստի առթիվ ՀՀ ՊՆ ռազմական ոստիկանությունում նախապատրաստվում են նյութեր:
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով:
Կարդացեք նաև
ՀՀ ՊՆ ռազմական ոստիկանություն
