«Ադրբեջանի տխրահռչակ նախագահ Իլհամ Ալիևը տպավորություն է ստացել, թե ինքը կամ իրենք մարսել են Արցախի որոշ տարածքների օկուպացիան, պատերազմական հանցագործությունները, գլխատումները»,- ՀՀ ԱԺ արտահերթ նիստի ժամանակ հայտարարեց ՀՀ ԱԺ ԼՀԿ խմբակցության ղեկավար Էդմոն Մարուքյանը:
Ըստ նրա՝ Ալիևն էյֆորիայի մեջ է, սխալը սխալի հետևից է անում. չի կատարել նոյեմբերի 9-ի հայտարարությամբ ամրագրված կետերը և այլն: Այս առիթով պատգամավորն ասաց. «Սա մեզ տալիս է հնարավորություն վերցնելու այդ սխալները և պատժելու Ադրբեջանի իշխանություններին, արդյունքում նաև ժողովրդին»:
Անդրադառնալով Սյունիքի դեպքերին՝ արձանագրեց, որ բոլոր գործընկեր պետություններն էլ փաստել են, որ դա ոտնձգություն է ՀՀ ինքնիշխան տարածքի նկատմամբ. «Սա այն դեպքը չէ, որ քարտեզի վեճ կա, սա Խծաբերդի պատմությունը չէ, ոչ մի պատմության նման չէ… Հասկանում եմ, որ ադրբեջանական կողմը քայլ է արել, առաջ է եկել. հաղթած կողմ է: Բոլորն ասում են՝ հետ գնա, բայց չգիտի՝ ոնց, ոնց հետ գնա, որ խայտառակ չլինի: Բայց ավելի խայտառակ հետևանքներ կարող են լինել: Կարող է ուղղակի հետ գնաք ոչ այնքանով, որքանով եկել եք: Ուղղակի ասեք, որ խառնել ենք քարտեզները»:
Տաթև ՀԱՐՈՒԹՅՈՒՆՅԱՆ
