«Գոնե պետք է վեր կենաք ու ասեք, որ մինչև հունիսի 20-ը մենք որոշակի երաշխիք կարող ենք տալ, որ որևէ հայրենազրկում չի շարունակվի»,-Սյունիքում, Գեղարքունիքում և Վայոց ձորում ստեղծված ճգնաժամային իրավիճակի առիթով հրավիրված ՀՀ ԱԺ արտահերթ նիստի ընթացքում հայտարարեց ՀՀ ԱԺ ԲՀԿ խմբակցության պատգամավոր Միքայել Մելքումյանը:
Նա նշեց, որ մեծացել է գիտնական աշխարհագրագետի ընտանիքում, որտեղ դպրոցական հասակից ամենատարբեր քարտեզներն են եղել և մանրակրկիտ պահպանված են: Նա ասաց. «Նայում եմ, գիտեմ խորհրդային Հայաստանի և Ադրբեջանի սահմանները որտեղից են սկսվում և վերջանում, ինչքան էլ դեմարկացիա, դելիմիտացիա չի եղել: Ուզում եմ ասեք՝ մեր պետությունն իսկապես այնքան թուլացել է, որ կարող ենք ամեն օր հանդիպել նման խնդիրների՞»:
Նա մտահոգություն հայտնեց, թե ՀՀ ԱԺ ամբիոնից իշխանության ներկայացուցիչների կողմից չի լսել հստակեցում, թե այս խնդիրներին կարող են լուծում տա՞լ, թե՞ մի օր կգա ու կասենք՝ պատերազմ եղավ, արդեն մեր տարածքներն ենք տալիս՝ չնայած ըստ պատգամավորի՝ տարբերություն չկա՝ Արցախի, թե ՀՀ տարածքներն ենք տալիս: Նա հույս հայտնեց, որ հունիսի 20-ից հետո կլինի ողջամիտ իշխանափոխություն, քանի որ ըստ նրա՝ այս խնդիրը օրը մեջ կարող է ի հայտ գալ:
Տաթև ՀԱՐՈՒԹՅՈՒՆՅԱՆ
