Երկրում ստեղծված ճգնաժամի հետեւանքով Հայաստանը չի կարող ՀԱՊԿ-ի վրա հույս դնել: Այս կարծիքին է «Ազատ հայրենիք» նախընտրական դաշինքի ներկայացուցիչ Արշակ Սադոյանը: Նա այսօր «Տեսակետ» ակումբում ասաց, որ պետք է հայացքն ուղղել այն ուժերի կողմը, որոնք շահագրգռված են տարածաշրջանում խաղաղության հաստատմանը. «Մինսկի խմբի համանախագահներից երկուսը հստակ հայանպաստ դիրք գրավեցին՝ պահանջում են ե՛ւ գերիների վերադարձը ե՛ւ սահմաններից դուրս գալ: Պետք է այդ հիմքերն ուժեղացնելով՝ գնալ պահանջները խստացնելուն»:
Արշակ Սադոյանը կարծում է, որ Հայաստանում առկա լարվածության պայմաններում արտահերթ խորհրդարանական ընտրությունների անցկացումը բոլորովին տեղին չէ: Ըստ նրա նման քաղաքական գործընթացների գնալուց առաջ նախ՝ պետք էր երկրում հանդարտեցնել կրքերը. «Երկրին պետք է կայունություն: Դա է թիվ մեկ խնդիրը: Նրանք, որոնք դեմ են անձնական շահերով առաջնորդվող, խիստ աղքատիկ ժառանգություն թողած նախկիներին, ովքեր դեմ են ապաշնորհ նորերին, առաջարկում ենք միավորվել, որի նպատակը կլինի հետեւյալը: Մեկ ու կես տարի անցումային ժամանակահատվածում երկիրը ոտքի կանգնեցնելը»:
Սադոյանը կարծում է՝ աննախադեպ ծավալի աշխատանք պետք է կատարվի՝ հաշվի առնելով պատերազմի կորուստները, որոնք թե՛ նյութական են, թե՛ մարդկային: Իսկ որպես առաջնահերթություն, տեսնում է անվտանգային համակարգն ամուր հիմքերի վրա դնելը: Եվ այդ ամենին զուգահեռ կարգի բերել տնտեսությունը. «Որքա՞ն կարելի է մի քանի անգամ հետ մնալ զարգացած երկրներից: Մենք հասկանում ենք, որ այդ բոլոր խնդիրները միայն հայաստանաբնակ ուժերով հնարավոր չէ անել, մենք հիմքում դրեցինք Սփյուռքի ներուժի օգտագործումը: Առաջարկում ենք ստեղծել նպատակային գործունեության կազմակերպություն, որի մայրաքաղաք-կենտրոն կլինի Հայաստանը»:
Սադոյանը կարծում է, որ Հայաստանի սուվերեն տարածք ներխուժած ադրբեջանցիներին հակադարձելու համար հայկական կողմը պետք է գերեվարի հակառակորդի զինվորներին՝ հետագայում մեր տղաների հետ փոխանակելու համար:
Կարդացեք նաև
Լուսինե ԲՈՒԴԱՂՅԱՆ
