Հոկտեմբերի 18-ին ԲԴԽ-ում շարունակվել է Վերաքննիչ քրեական դատարանի դատավոր Սերգեյ Մարաբյանին կարգապահական պատասխանատվության ենթարկելու հարցի վերաբերյալ միջնորդության քննությունը:
Նիստի մեկնարկին Խորհուրդը հայտարարել է, որ հետաձգում է դատավոր Մարաբյանի՝ նախկինում ներկայացրած միջնորդության քննությունը՝ գործի վարույթը կարճելու վերաբերյալ:
Դատավոր Սերգեյ Մարաբյանը հանդես է եկել միջնորդությամբ՝ իրեն կարգապահական պատասխանատվության ենթարկելու գործով վարույթը կասեցնելու եւ Սահմանադրական դատարան դիմելու վերաբերյալ։
Ըստ դատավորի՝ «Դատական օրենսգիրք» սահմանադրական օրենքի 142-րդ հոդվածի 1-ին մասի 1-ին կետը, որը սահմանում է դատավորին կարգապահական պատասխանատվության ենթարկելու հիմքերը, հակասում է Սահմանադրության 162-րդ հոդվածի 2-րդ մասին եւ 164-րդ հոդվածի 2-րդ մասին։
Խորհուրդը ժամանակ է տրամադրել Արդարադատության նախարարության ներկայացուցիչներին՝ այս միջնորդության վերաբերյալ դիրքորոշում հայտնելու համար: Ըստ Մարաբյանի մեկ այլ միջնորդության. «դատավորների նկատմամբ Արդարադատության նախարարության կողմից վարույթներ հարուցելու հնարավորությունը հակասում է Սահմանադրությանը» եւ այս հարցով ԲԴԽ-ն պետք է դիմի Սահմանադրական դատարան:
Կարդացեք նաև
Բացի այդ՝ Արդարադատության նախարարության կողմից ներկայացված՝ դատավորի նկատմամբ կարգապահական վարույթ հարուցելու հարցի վերաբերյալ կարծիք հայտնելու համար դատավոր Սերգեյ Մարաբյանը ժամանակ խնդրեց:
Սեփ.լր.
Լուսանկարը՝ ԲԴԽ-ի ֆեյսբուքյան էջից
«Առավոտ» օրաթերթ
21.10.2021
