Արցախի հանրապետության ազգային ժողովի այսօրվա նիստում քննարկվեց «ԱՀ սահմանադրության փոփոխության մասին» նախագիծը, որով առաջարկվում է սահմանադրությամբ նախատեսված՝ վարչատարածքային բաժանման վերանայման գործընթացի ժամկետները երկարաձգել եւ 5 տարին դարձնել 10 տարի: Ինչպես զեկուցեց ԱՀ նախագահի ներկայացուցիչ, Արցախի տարածքային կառավարման եւ ենթակառուցվածքների նախարար Հայկ Խանումյանը, դեռեւս մեկ տարի առաջ իրավիճակը՝ վարչատարածքային բաժանման վերանայման մասին կետը, քննարկվել է:
«Քաղաքական ուժերի մոտ կա կոնսենսուս, որ մարտին վարչատարածքային բաժանման վերաբերյալ փոփոխություններ չենք անի: Համապատասխան քաղաքական որոշման դեպքում կմշակվի հայեցակարգ: Պատերազմից առաջ գնում էինք խոշորացման, մշակվում էր հայեցակարգ, բայց հետեւանքները հաշվի առնելով՝ քաղաքական ուժերն առաջարկեցին այդ ճանապարհով չգնալ: Առաջիկայում միջհամայնքային միավորումների հետ կապված նախաձեռնություններ կլինեն, եւ դա խոշորացում չէ, այլ համայնքների գործակցության մեխանիզմ»,-տեղեկացրեց Հայկ Խանումյանը:
Քվեարկությամբ որոշումն ընդունվեց երեսուն կողմ ձայներով: Հաջորդիվ տեղի ունեցած միաձայն քվեարկությամբ այս նախագիծը ներկայացվելու է Արցախի գերագույն խորհրդին՝ սահմանադրությանը համապատասխանության հարցը լուծելու նպատակով:
Լուիզա ՍՈՒՔԻԱՍՅԱՆ
