«Մամիկոն Ասլանյան» կուսակցությունների դաշինքի ավագանու անդամ Արթուր Օհանյանը մեր զրույցում ասաց, որ դատի են տվել եւ պահանջում են, որպեսզի Վանաձոր համայնքի ավագանու նիստերի ժամանակ Մամիկոն Ասլանյանին տրամադրեն ինտերնետ կապ եւ տեխնիկական միջոց՝ նիստերին հեռավար ձեւաչափով մասնակցելու հնարավորությունն ապահովելու համար. «Դիմել ենք, որպեսզի Մամիկոն Ասլանյանի Սահմանադրական իրավունքը վերականգնվի: Փաստաբանները դատախազություն էին դիմել, դատախազությունն էլ ուղղորդել էր դեպի արդարադատության նախարարություն: Հիմա նախարարությունից ուզում ենք պատասխանը ստանալ իր իրավունքն իրացնելու հետ կապված: Այս պահին ընթացքի մեջ է, դեռեւս պատասխան չունենք եւ որեւիցե հստակ գործողություն այդ առումով չեմ տեսնում: Մարդու իրավունքների պաշտպանը նույնպես անդրադարձել էր այս հարցին»:
Արթուր Օհանյան
Օհանյանի խոսքով՝ այս մասով օրենքի բաց կա. «Քրեակատարողական հիմնարկի ղեկավարն իրավունք չունի նման լիազորություն իրականացնելու: Բայց իմ կարծիքով, եթե խանգարող ինչ-որ բան չկա, մեխանիզմ հնարավոր է ունենալ: Նաեւ ԱԺ-ում արդարադատության նախարարին առաջարկվեց, որպեսզի մեխանիզմ մշակվի: Դա կարող էր շատ արագ կազմակերպվեր, բայց այս պահին որեւիցե բան չունենք»:
Այս պահի դրությամբ Մամիկոն Ասլանյանի մոտ արգելված է որեւէ տեսակցություն կամ հեռախոսազանգ:
Տաթեւիկ ՂԱԶԱՐՅԱՆ
