Կ. Դեմիրճյանի անվան մարզահամերգային համալիրում կայացավ H2Օ Emotional Exposition խորագրով ինտերակտիվ ցուցադրությունը՝ համեմված նորաձևության տարրերով: Ցուցադրության հեղինակը Kivera Naynomis հայտնի բրենդի հիմնադիր Արևիկ Սիմոնյանն է։ Գաղափարի հիմքում, որի իրականացմանը անմիջական մասնակցություն է ունեցել նաեւ «Արունիկ» ֆոնդի հիմնադրիր Արուսյակ Ստեփանյանը, ազգային մշակույթի պահպանման կարեւորության շեշտադրումն է, ոգեշնչման աղբյուրը՝ ազգային զարդանախշերը:
Տպավորիչ ցուցադրությունը 8 նույնքան ազդեցիկ սրահներում էր՝ Երկինք, Ծնունդ, Մկրտություն, Օրհնություն, Մեղսագործություն, Ցավ, Կորուստ, Դատարկություն: Ցուցադրության հեղինակ Արեւիկ Սիմոնյանը կարծում է, որ աշխարհին կարող ենք լավագույնս ներկայանալ ազգային մշակույթով, սակայն այն պետք է լինի հասցեական:
Կարդացեք նաև
Նա նշեց, որ Արցախյան երկրորդ պատերազմը խորը հետք է թողել իր հոգում՝ էլ ավելի մեծացնելով ողբերգական իրադարձությունների պատճառով արժեքներ ու սկզբունքներ կորցնելու տագնապը: Մի խոսքով, նման ցուցադրություն իրականացնելու միտքը ծնվել է հենց 44-օրյա պատերազմից հետո:
«Ես ցանկացել եմ ցույց տալ ոչ թե զուտ պատերազմը, որ մեծ ցավ է, այլ շեշտադրել այն, որ մենք մարդ ենք, որից պատերազմը շատ կարեւոր բաներ է խլում: Մենք ցանկացել ենք ցույց տալ մարդու կյանքի ճանապարհը՝ հիմնավորելով, որ ամեն ինչ կախված է մեր ընտրությունից: Դրա համար մենք պետք է ընտրենք բարին, իսկ դրա կողքին մեր եկեղեցին է, մեր հավատը»,- ասաց Արեւիկ Սիմոնյանը։
Ինչ վերաբերվում է H2O խորագրին, դա էլ բխում է ջրի հավերժականության ու յուրաքանչյուրի կյանքում մշտական լինելիության գաղափարից: «Ջուրն այն է, ինչից ստեղծված ենք… Ուրախանում ենք, ունենում ենք երջանկության արցունքներ, լաց ենք լինում, մեր աչքերից արցունք է գալիս, մեր մկրտության ժամանակ էլ ջուրը կա»,- պարզաբանեց նա:
Ի տարբերություն Kivera Naynomis բրենդի նախորդ ցուցադրությունների, H2O-ի պարագայում հագուստը չէին ցուցադրում մոդելները, դրանք ցուցադրված էին մանեկենների վրա: Արեւիկ Սիմոնյանը վստահեցնում է, որ այս ցուցադրության առանցքում ոչ թե զուտ հավաքածուն է, այլ մեր հավատքը, աշխարհում առաջինը Քրիստոնեություն ընդունած հայը: Արուսյակ Ստեփանյանն էլ ի թիվս այլնի՝ նշեց, որ կապույտ եւ սպիտակ գույները հատուկ են ընտրված:
Հիշեցնենք, որ անցյալ տարի էլ կայացել էր Արեւիկ Սիմոնյանի «Վերածնունդ» հավաքածուի շնորհանդեսը՝ Էրեբունի պատմահնագիտական արգելոց-թանգարանում: Հեղինակն այս հավաքածուում ընդգծել էր հայ ազգի ապրումներն ու հույզերը՝ վստահ լինելով, որ վերածնունդ լինելու է: Վերածնունդն էլ խորհրդանշել էր ցուցադրությունն ավարտող սպիտակ հագուստով հղի կնոջ կերպարով:
Ցուցադրությունը կներկայացվի ՌԴ-ում՝ Մոսկվայում, ԱՄՆ-ում եւ Եվրոպայում:
Գոհար ՀԱԿՈԲՅԱՆ
