ԱԺ «Հայաստան» խմբակցության պատգամավոր Արմենուհի Կյուրեղյանը «Հայելի» ակումբում պատմեց, թե ինչո՞ւ են քաղաքական մեծամասնության պատգամավորները մերժում ընդդիմադիրների նախագծերը:
«Այս իշխանությունը բացարձակ պատրաստ չէ հանրային հետաքրքրություն ունեցող որեւէ հարցի շուրջ քննարկման նստել: Երեկ՝ քառօրյայի առաջին օրը, մենք ինչո՞վ էինք զբաղված: ԱԺ-ում քննարկում էինք, թե, արդյոք քննարկման նյութ պետք է դարձնել Հայաստանում սոցիալապես անապահովների՝ կենսաթոշակառուների, նպաստառուների կենսաթոշակների, նպաստների բարձրացման հարցը: Պատկերացնո՞ւմ եք, ոչ թե նախագիծ էինք քննարկում, այլ քննարկում էինք արդյոք քննարկման առարկա՞ է այդ հարցը, թե՞ ոչ:
Տարվա վերջին, երբ բյուջեի քննարկում էր, նրանք ժողովրդին խաբում էին, թե սպասվում է թոշակների բարձրացում: Իրենք չէին հայտարարում, որ 480 հազարից ընդամենը 21600 թոշակառուի թոշակ է բարձրացվելու ընդամենը 2600 դրամով: Եվ նրանք այս բարձրացումը թմբկահարում էին մի ամբողջ կես տարի: Փաստացի այսօր մարդկանց ոչ միայն թոշակը չի բարձրացել, այլեւ ունենք գնաճի կտրուկ՝ 7%-ի հասնող բարձրացում: Էլ չեմ ասում, որ գազը, լույսը, ջուրը արդեն թանկացել են: Եվ խոսել սոցիալական երկիր կառուցելու, կենսապահովման մակարդակը բարձրացնելու մասին իրենց խոստումների կատարումից, աբսուրդ է:
Մեր խմբակցությունը երեկ կոնկրետ նախագիծ էր բերել, որի քննարկումն անգամ մերժվեց: Դրանով հստակ առաջարկում էինք կենսաթոշակների եւ նպաստների ինդեքսավորում մտցնել:
Կարդացեք նաև
Հաջորդ առաջարկը, որի քննարկումը նույնպես մերժվեց, հետեւյալն էր: Յուրաքանչյուր կենսաթոշակառու ամեն տարի պարտավոր է ներկայանալ ազգային օպերատորին կամ համապատասխան բանկ եւ հայտարարություն ստորագրել Հայաստանում իր ներկայության մասին, որից հետո միայն նա կարող է ստանալ իր թոշակը: Մենք առաջարկում ենք այդ ֆիզիկական ներկայության հարցը առաջնային չհամարել: Ինչո՞ւ, որովհետեւ մենք ունենք էլեկտրոնային համակարգ, որտեղ հստակ ֆիքսվում է Հայաստանից դուրս գնալը եւ Հայաստան ներս գալը: Մենք առաջարկում ենք աշխատեցնել այդ տեղեկատվական համակարգը եւ թոշակառուին չստիպենք ֆիզիկապես ներկայանալ: Եվ սա էլ մերժվեց պատճառաբանությամբ, որ ունենք երկքաղաքացիներ, որոնք կարող են մի անձնագրով գալ, մյուսով գնալ եւ փաստացիորեն չենք կարող վերահսկել: Բայց եղբայր, մենք ունենք երկքաղաքացիների վերաբերյալ տվյալների բազա: Դե ուրեմն, եկեք մի հատ համապատասխան պարզ ծրագիր գրենք:
Ամենակարեւոր առաջարկներից մեկն էլ, որ նորից մերժվեց, հետեւյալն էր: Իրենք իրենց կառավարության ծրագրում ընդունել են, որ 2021-ից մինչեւ 2026 թվականը նվազագույն եւ միջին թոշակը պետք է համապատասխանեցվի նվազագույն զամբյուղին եւ սպառողական զամբյուղին: Ընդ որում, դա դաշնակցության ծրագրում վաղուց կա: Արդեն մեկ տարին անցել է եւ 2022 թվականի վերջում պետք է ծրագիր կազմել, թե ինչ պետք է անել: Մենք առաջարկում ենք, որպեսզի այդ համապատասխանեցումը չթողնվի 2026 թվականին եւ միանգամից փորձել համապատասխանեցնել, ինչը շատ դժվար կլինի: Եկեք դա անենք փուլ առ փուլ: Ու նորից իրենք ասում են ոչ, թողեք մենք ճկուն գործունեություն ծավալենք:
Իրենք հիմա դա չեն ընդունում, որովհետեւ չեն ուզում, որ որեւէ սոցիալական երաշխիք տրվի կենսաթոշակառուին, նպաստառուին, որովհետեւ այդ առաջարկը եկել է ընդդիմությունից: Ըստ էության, մենք առաջարկում ենք իրենց ծրագրերը իրականացնելու մեխանիզմ: Եվ էական էլ չէ, թե ով է ներկայացնում: Կարեւոր է, որ մեր թոշակառուների կյանքի բարելավման հնարավորություն ենք ուզում ստեղծել, փորձում ենք կենսապահովման խնդիր լուծել»,-ասաց ՀՅԴ կուսակցության անդամ Արմենուհի Կյուրեղյանը:
Աշոտ ՀԱԿՈԲՅԱՆ
