Ռուսաստանում ապրող մի շարք քաղաքացիներ, այդ թվում եւ մեր հայրենակիցներն՝ արդեն քանի օր է՝ տելեգրամյան ալիքներում հայաստանցիներին հարցուփորձ են անում՝ «Կասե՞ք վարձով բնակարանների գները», «Ռուսական բանկի քարտերով կարո՞ղ ենք Հայաստանում գումար կանխիկացնել», «Մեզ հետ ռուսական ռուբլի՞ բերենք, թե՞ տարադրամ, ո՞րն է ձեռնտու», «Հայաստանում բժիշկ աշխատելու համար բավարա՞ր է Ռուսաստանի դիպլոմը, թե՞ պետք է լրացուցիչ վերապատրաստում անցնել»:
«Релокация в Армению» էջը հենց այդ նպատակով է ստեղծվել, որի մասնակիցների թիվը րոպե առ րոպե աճում է: Տելեգրամյան այս ալիքում արդեն 10 հազարին մոտ մասնակիցներից բաղկացած խումբ էր ստեղծվել: Խմբում բացի այն անձանցից, որոնք արեւմտյան ընկերությունների հետ են աշխատում եւ ռուս-ուկրաինական պատերազմի հետեւանքով առաջացած սահմանափակումների պատճառով մտածում են բիզնեսը երրորդ երկիր տեղափոխել, կան նաեւ անհատ քաղաքացիներ, որոնք մտադրություն ունեն միայնակ կամ ընտանիքի, երեխաների հետ տեղափոխվել Հայաստան: Նրանց մեջ մեծ թիվ են կազմում ՌԴ քաղաքացիները: Երեխաներով եկողներին հետաքրքրում է՝ Հայաստանում կա՞ն ռուսական դպրոցներ, բուհեր, մանկական զարգացման կենտրոններ, մարդիկ էլ, որոնք շուն կատու կամ ընտանի այլ կենդանիներ ունեն հետաքրքրվում են՝ ինչպես նրանց հասցնել Հայաստան, ինչպիսի թույլտվություններ ու թղթաբանություն է պետք:
Ոմանք էլ Արցախում տիրող իրավիճակից են հարցուփորձ անում եւ արդյոք խաղա՞ղ են Հայաստանի սահմանները: Խմբում ակտիվ հայաստանցիները հանգստացնում են՝ «պատերազմն Արցախում է եղել, հիմա այնտեղ ռուս խաղաղապահներն են, Հայաստանում խաղաղ է, վտանգ չկա, եկեք»:
Տելեգրամյան այս ալիքում, այսպես ասած՝ «բանակից փախածներն» էլ քիչ չեն: Նրանք էլ հարցնում են՝ կարո՞ղ են գալ Հայաստան, թե՝ կբռնվեն: Նշում էին, որ ՌԴ քաղաքացիություն ունեն եւ ազատված են ՌԴ-ում ծառայելու պարտավորությունից, քանի որ առողջական խնդիրներ ունեն:
Վարձով բնակարաններով հետաքրքրվողներին էլ ավելի ճարպիկ հայաստանցիները, որոնք չի բացառվում, անշարժ գույքի բրոքերներ են, տեղում բնակարաններ են առաջարկում՝ կից գնացուցակով:
Կարդացեք նաև
Որոշ մասնակիցներ էլ այստեղ իրենց ապրանքներն են գովազդում, ինչին ի պատասխան «չաթի» մոդերատորները զգուշացնում են, որ նման հրապարակումները հեռացվելու են եւ, այսպես ասած՝ հիշեցնում են ինչի համար են հավաքվել:
Կան մարդիկ էլ, որոնք արդեն հստակ որոշել են՝ տեղափոխվում են Հայաստան, բայց համատեղ ապրող են փնտրում, որ բնակարանի վարձը էժան նստի: Այս ալիքի միջոցով Ռուսաստանի քաղաքացիները դիզայների, լանդշաֆտի մասնագետի, ուսուցչի, էլեկտրիկի, մերսողի, SMM-ի՝ սոցիալական ցանցերի մարկետոլոգի աշխատանք են փնտրում:
Նրանցից ոմանք նույնիսկ տեղում առաջարկներ են ստանում:
Իսկ ավելի զգուշավորները խորհուրդ են հարցնում՝ գուցե չշտապե՞ն տեղափոխվել, քանի որ կարող է պատերազմը Հայաստան էլ տեղափոխվել:
ՌԴ քաղաքացիներին խորհուրդներով ու տեղեկատվությամբ օգնող մեր հայրենակիցները պատասխանում են՝ «Դա կլինի 3-րդ համաշխարհային պատերազմը եւ արդեն կարեւոր չէ՝ որտեղ կմահանան Ռուսաստանում, Ուկրաինայո՞ւմ թե՝ Հայաստանում»:
Այս ալիքի՝ մի «հաճախորդի» էլ ուղղակի հետաքրքրում էր՝ ալկոհոլի որակը լա՞վն է Հայաստանում, ազատ վաճառվո՞ւմ է, կարելի՞ է «բարում» ծանոթանալ անծանոթ մարդկանց հետ:
Ոմանք էլ արդեն հասել էին Հայաստան եւ իրենց անցած ճանապարհի մասին մանրամասն կիսվում էին տելեգրամյան այս «չաթում», նաեւ հարցնում՝ ո՞րն է ամենահայտնի եւ արագ սննդի առաքման ծառայությունը:
Լուսինե ԲՈՒԴԱՂՅԱՆ
