Ռամկավար Ազատական կուսակցության հայտարարությունը
Բազմիցս խախտելով երեք երկրների եռակողմ համաձայնագրերը՝ Ադրբեջանը 2022թ. մարտի 8-ից շարունակաբար իրականացնում է հրադադարի խախտումներ Արցախի շփման գծում՝ արդյունքում պատճառելով մարդկային և նյութական կորուստներ, արդեն երկրորդ անգամ միտումնավոր դադարեցնում է Արցախի գազամատակարարումը, ստեղծելով ազգաբնակչության հումանիտար ճգնաժամային աղետ:
Մարտի 24-ին թշնամին հրահրելով ռազմական բախում՝ իր տիրապետության տակ վերցրեց Փառուխ գյուղը և հարակից ռազմավարական տարածքները՝ տեղահանելով բնակչությանը և պատճառելով մարդկային կորուստներ:
Սրանով Ադրբեջանը շարունակում է Արցախը հայաթափելու իր նպատակային քաղաքականությունը, ընդ որում, դա իրականացնելով ռուսական խաղաղապահների պատասխանատվության տակ գտնվող գոտում, փորձելով հեղինակազրկել խաղաղապահներին միջազգային հանրության և Արցախի ազգաբնակչության շրջանում՝ արհամարհելով 2020թ. նոյեմբերի 9-ի եռակողմ հայտարարությամբ սահմանված որոշումը:
Կարդացեք նաև
Ակներև է, որ թշնամին օգտվում է աշխարհի մի շարք խոշոր տերությունների լարված և գերշիկացած իրավիճակից, պղտոր ջրում ձուկ որսալով՝ առաջ է տանում իր հակահայ քաղաքականությունը:
Ռամկավար Ազատական կուսակցության Կենտրոնական վարչությունը խստորեն դատապարտում է Արցախի դեմ Ադրբեջանի թշնամական ագրեսիան, նրա կողմից ստանձնած պարտավորությունների կոպտագույն խախտումները, որոնք ամենևին էլ չեն բերում խաղաղության հաստատման:
Միևնույն ժամանակ, մարտի 25-ին, Արցախի հասարակության որոշ խմբեր փորձում են «մեղավորներ» գտնել, օրհասական վիճակը կապել անհատի գործոնի հետ՝ չհասկանալով, որ դրանով ջուր են լցնում հենց թշնամու ջրաղացին, պառակտում հասարակությունը: Նման անկայուն իրավիճակ ստեղծելը դատապարտելի է, թշնամու ցանկություններին նպաստող:
Մինչդեռ, ավելի քան երբևէ, անհրաժեշտ է բազմակողմանի համախմբում:
Ռամկավար Ազատական կուսակցության կենտրոնական վարչությունը կոչ է անում բոլոր քաղաքական ուժերին ու առաջնորդող անհատներին՝ լինել միահամուռ բռունցք՝ պատասխան տալու նենգ ոսոխին, որի համար օգտագործել քաղաքական, դիվանագիտական և անվտանգության պաշտպանման ողջ գործիքակազմը:
Հովիկ ԿԱՐԱՊԵՏՅԱՆ
ՌԱԿ ատենադպիր
Հրաչյա ԿԱՐԱՊԵՏՅԱՆ
ՌԱԿ ատենապետ
