Ապրիլի 26-ին Պարոնյան-Լեո փողոցների խաչմերուկում մահվան ելքով հղի կնոջը՝ Սոնա Մնացականյանին, վրաերթի ենթարկած ՃՈ ուղեկցող սպայական վաշտի հրամանատար Արամ Նավասարդյանը Երեւանի գլխավոր դատախազի ցուցումով այսօր կրկին ձերբակալվել է: Այսօր՝ ուշ երեկոյան, դատարանը կքննի կալանքի միջնորդությունը:
«Այս միջնորդությունն ինձ համար շատ անընդունելի է, 10 օր է՝ դրսում է, որեւէ բանից չի խուսափում: Քննիչները պարզապես քաղաքի գլխավոր դատախազի ցանկությունն են կատարում, քանի որ Երեւանի գլխավոր դատախազը ցուցում է գրել, օրենքը նրան թույլ է տալիս: Նա ուղղակիորեն պահանջ է ներկայացրել՝ կալանավորել: Քրեական օրենսգրքի 244 հոդվածով մեղադրանք առաջադրել, ձերբակալել ու կալանավորել: Ես սա չեմ ընդունում,որովհետեւ այստեղ փախուստ չկա, դեպքի վայրը թողնել չկա: Սա էլ իրենց համար տրոլեյբուսի վարորդ չէ, որ չիմանա՝ ինչ անի: Իրեն բավարար է ռադիոկապ ու հեռախոս, որ ինքը բարձր մակարդակով այդ օգնությունը կազմակերպի: Հետո իրենք մոռանում են, որ վրաերթից հետո տեսուչը քաշքշուկի է ենթարկվել հավաքված քաղաքացիների կողմից, ու Արամ Նավասարդյանը ռադիոկապով տեղեկացել է այդ մասին: Այդ պայմաններում Ոստիկանության հասցեին վատ բաներ է հնչեցվել, ոչ կոռեկտ արտահայտություններ: Այսինքն՝ այս պայմաններում իմ պաշտպանյալը սխա՞լ է վարվել, այդ մեքենայով, եթե հետ գար, այդ մեքենան շուռ կտային ու կվառեին: Այս քաղաքական խմորումներում կան նմանատիպ կերպարներ, որոնք պատրաստ են ամեն ինչի: Այս վրաերթը քաղաքական նպատակներով է օգտագործվում»,- Aravot.am-ին ասաց փաստաբան Ռուբեն Բալոյանը:
Փաստաբանի խոսքով, ոչ մեկ իրավունք չունի ասել՝ Արամ Նավասարդյանը լքել է դեպքի վայրը, նա քաղաքացիական հագուստով եկել ու մասնակցել է դեպքի զննությանը. «Անվտանգության նկատառումներով նա դեպքի վայր այդ պահին չի վերադարձել»:
Տուժողի ներկայացուցիչ Րաֆֆի Ասլանյանը հայտարարել էր, որ տուժող կողմը հետևողական է լինելու Սոնա Մնացականյանի դաժան վրաերթի, անօգնական վիճակում թողնելու հանգամանքների բացահայտմանը, այդպիսով նաև նրա մահվան համար մեղավոր բոլոր անձանց քրեական պատասխանատվության անխուսափելիությանը հասնելու ուղղությամբ:
Կարդացեք նաև
Ովքեր են մեղավորները մեր հարցին փաստաբան Ռուբեն Բալոյանը պատասխանեց. «Իրենց համար մեղավորը Արամ Նավասարդյանն է, ինձ համար՝ հետիոտն աղջիկն է: Քանի որ իր գործողություններով է պայմանավորված այս վրաերթը»: Այս գործով տեսուչը նույնպես հարցաքննվել է, նա, ըստ փաստաբանի, նույնպես հայտնել է, որ աղջկանից պահանջել է կանգնել. «Հիմա ինձ մոտ որոշակի անձինք հարց են բարձրացնում, թե աղջիկը չի տեսել, ուրեմն 15 ավտո լուսային ու ձայնային ազդանշանները միացրած գալիս են, ինքը ոնց կարող է չտեսնել»:
Իսկ ինչ է ասել տեսուչը՝ մահացած կինը տեսե՞լ է, թե՞ չի տեսել, փաստաբանն ասաց՝ եկեք մանր հարցեր մի տվեք, տեսուչը պահանջել է կանգնել, ճանապարհը չշարունակել:
Անդրադառնալով տուժող կողմի պնդմանը, թե աղջկան անօգնական են թողել, հեռացել, Ռուբեն Բալոյանը չհամաձայնեց. «Դեպքի վայրում հարյուրավոր մարդիկ կան, ինչ անօգնական վիճակի մասին է խոսքը: Հարյուրավոր մարդիկ են եղել, այդ թվում ոստիկանության աշխատակիցներ, որոնք շատ արագ ձեւով ու պատշաճ կազմակերպել են տուժողի տեղափոխումը հիվանդանոց, ընդորում՝ շտապ օգնության կայանը գտնվում է դեպքի վայրի հարեւանությամբ: Գրեթե մեկ րոպեի ընթացքում շտապ օգնության մեքենան հասել է դեպքի վայր տեսուչի կանչով ու միանգամից տեղափոխել Նաիրի բժշկական կենտրոն, ցույց են տվել անհապաղ ու բարձրակարգ օգնություն: Այս հարցին միջամտել է նաեւ հենց Արամ Նավասարդյանը, խոսել է հիվանդանոցի բաժնի վարիչի հետ, խնդրել է բարձրակարգ օգնություն ցուցաբերել, ամեն ինչ անել, որ կյանքը փրկեն»:
Փաստաբանը նաեւ հայտնեց, որ Արամ Նավասարդյանն անձամբ չի այցելել տուժողի հարազատներին, բայց նրա եղբայրն ու այլ հարազատներ մասնակցել են աղջկա թե՛ հոգեհանգստի, թե՛ թաղման արարողությանը, բայց չեն ներկայացել:
Արփինե ՍԻՄՈՆՅԱՆ
