«Տարօրինակ միտում կա հիմա։ Վստահ չեմ, որ բոլորն են հետեւում ՀՀ-ում հանքարդյունաբերության զարգացման ռազմավարության մշակման գործընթացին, որում մի շատ տարօրինակ բան է ամրագրված․ առաջարկվում է, որպեսզի պետությունն ընդերքօգտագործման իրավունք տրամադրելուն զուգահեռ մասնավոր ընկերությանը՝ ընդերքօգտագործողին, տրամադրի նաեւ հողի նկատմամբ իրավունքներ»,-«Մարդու իրավունքների հետազոտությունների կենտրոն» հ/կ-ի կազմակերպած՝ «ՀՀ սահմանադրության բարեփոխումներ․ մարդու իրավունքների օրակարգը» խորագրով քննարկման ժամանակ այսօր հայտարարեց իրավաբան, բնապահպանության եւ ընդերքի տեսչական մարմնի նախկին ղեկավար Արթուր Գրիգորյանը։
Նրա խոսքով՝ հողը կարող է լինել մասնավոր կամ համայնքային սեփականություն, բայց առաջարկվում է ընդերքօգտագործողին տալ հողի հանդեպ իրավունքներ․ «Պետական մարմինները որեւէ կերպ չեն մեկնաբանում, հասկանալի չէ, թե սա ինչ գործընթաց է։ Գուցե պետք է ավելի՞ ամրագրել հողի, անշարժ գույքի նկատմամբ քաղաքացու սեփականության իրավունքը։
Ո՞նց կարող է պետությունն ընդերքի օգտագործմանը զուգահեռ՝ ընդերքօգտագործողին տրամադրել այլ անձին պատկանող հողի նկատմամբ իրավունքներ։ Նոր բան են ուզում առաջ մղել, որ եթե ընդերքօգտագործողն ու քաղաքացին համաձայնության չեն գալիս, ապա դատարանի որոշմամբ պետք է հողի օգտագործումը տրամադրվի ընդերքօգտագործողին»։
Կարդացեք նաև
Լուիզա ՍՈՒՔԻԱՍՅԱՆ
