Հայաստանում վերջին մեկ ամսվա ընթացքում ունենք կորոնավիրուսի հիվանդացության աճ: Կառավարության նիստից հետո տեղի ունեցած ճեպազրույցում հայտնեց առողջապահության նախարար Անահիտ Ավանեսյանը: Ասաց, որ ցուցանիշի աճը պայմանավորված է ճամփորդությունների ակտիվացմամբ. «Ինչպես գիտեք եվրոպական երկրներում ալիքը բավական ակտիվ զարգանում է, եւ մենք կանխատեսում էինք, որ ճամփորդությունների ակտիվացմանը զուգահեռ՝ վարակի որոշակի ներթափանցում կարող է լինել մեր երկիր: Մենք զգոն հետեւում ենք զարգացումներին եւ մեր առողջապահական համակարգը պատրաստ է ցանկացած զարգացման»,-ասաց նախարարը:
Առաջին երկու շաբաթվա ընթացքում պարզ կլինի՝ այս վարակի ալիքը տարածվելու միտում ունի՞, թե՞ կգնա դեպի կայունացում:
Անահիտ Ավանեսյանն ասաց, որ եթե համաճարակային իրավիճակը սրվի՝ կգնան սահմանափակումների. «Մենք արդեն իսկ ունենք մշակված ուղեցույց, թե ալիքի տարածման որ փուլում ինչ քայլեր ենք անելու: Մեր խորհուրդն է՝ բժշկական կենտրոններ այցելելիս կրել դիմակ: Այն անձանց, ովքեր ստացել են երկու դեղաչափ պատվաստանյութ, խորհուրդ ենք տալիս մինչեւ սեպտեմբեր ստանան խթանիչ դեղաչափը, որպեսզի օրգանիզմն ունենա հնարավորություն աշնան ալիքներին պատրաստ լինելու: Շոգ եղանակը հակացուցում չէ պատվաստման համար»:
Կարդացեք նաև
Ասաց նաեւ, որ շրջանառվում են օմիկրոնի ենթաշտամերը:
Նախարարի տվյալներով, երկրում ամբողջապես պատվաստված է չափահասների 45%-ը։
Լուսինե ԲՈՒԴԱՂՅԱՆ
