Aravot.am-ը շախմատի համաշխարհային օլիմպիադայի հաղթող, ՀՇՖ փոխնախագահ Սմբատ Լպուտյանին խնդրեց մեկնաբանել աշխարհի գործող չեմպիոն Մագնուս Կարլսենի՝ թագի հավակնորդ Յան Նեպոմնյաշչիի հետ մրցամարտից հրաժարվելու որոշումը:
«Լուրը դեռ նոր է տարածվել եւ շատ մանրամասներ դեռ անհայտ են: Դրա համար զերծ կմնամ որեւէ ենթադրություն անելուց: Ժամանակ դեռ շատ կա ու իրադարձությունների ցանկացած զարգացում հնարավոր է: Այնպես որ, եկեք սպասենք»,-պատասխանեց գրոսմայստերը:
Հիշեցնելով, որ շախմատի պատմության մեջ արդեն մեկ անգամ նման բան եղել է, երբ ամերիկացի Ռոբերտ Ֆիշերը 1972 թվականին աշխարհի չեմպիոնի կոչումը Ռեյկյավիկում վերցնելով Խորհրդային Միության ներկայացուցիչ Բորիս Սպասկուց, 1975-ին հրաժարվեց տիտղոսը պաշտպանել այն բանից հետո, երբ ՖԻԴԵ-ն մերժեց իր բոլոր պահանջները՝ ցանկացանք իմանալ, թե դրանց մեջ նմանություն տեսնո՞ւմ է, Սմբատ Լպուտյանը պատասխանեց. «Գուցե, ավելի շատ տարբերություն կա: Ֆիշերը մեկ անգամ աշխարհի չեմպիոն դառնալուց հետո այլեւս կոչումը չպաշտպանեց, իսկ Կարլսենը մի քանի անգամ մասնակցել է տիտղոսի պաշտպանության մրցամարտերին: Եվ երկրորդ. Ֆիշերը այն ժամանակ հեռացավ շախմատից, իսկ Կարլսենը, որքան տեղյակ եմ, ակնարկել է, որ շարունակելու է զբաղվել ակտիվ շախմատով»:
Սմբատ Լպուտյանը ափսոսանք, հայտնեց, որ, հնարավոր է, Կարլսեն-Նեպոմնյաշչի մրցամարտը չկայանա՝ նշելով, որ վերջինը փայլուն հանդես եկավ հավակնորդների մրցաշարում ու հաղթեց՝ ցույց տալով, որ ինքը արժանի մրցակից է եւ այս անգամ երկրորդ փորձից խաղատախտակի առջեւ ջանք չի խնայի նորվեգացուն գահընկեց անելու համար:
Կարդացեք նաև
Աշոտ ՀԱԿՈԲՅԱՆ
