Տավուշի մարզի սահմանամերձ Չինարի բնակավայրում 2 օր շարունակ տիրում էր մշակութային բարձր տրամադրություն։ «Չինարի» հայրենակցական միության նախաձեռնությամբ կամակերպվել էր հագեցած համերգային ծրագիր։
«Այս նախաձեռնությունը «Չինարի» հայրենակցական միության կողմից իրականացրած ամենակարևոր ծրագրերից մեկն է: Այն ուղղված է սահմանապահ բնակիչներին խրախուսելուն: Նախաձեռնությունը պետք է լինի շարունակական և ոչ միայն Չինարիում»,- իր խոսքում նշեց «Չինարի» հայրենակցական միության նախագահ Գևորգ Վանյանը:
Ինչպես նախկինում տեղեկացրել էինք, Խորանաշատ վանական համալիրի հիմնադրման 800-ամյակին նվիրված միջոցառումները մեկնարկել են դեռևս մայիսի 11-ին՝ Երևանում, իսկ մայիսի 28-ին Տավուշի թեմի առաջնորդ Բագրատ եպիսկոպոս Գալստանյանի ձեռամբ վանական համալիրում Սուրբ Պատարագ էր մատուցվել:
Չինարի բնակավայրի վարչական ղեկավար Սամվել Սաղոյանն Aravot.am-ի հետ զրույցում նշեց, որ թեպետ չինարեցին միշտ ամուր կանգնած է իր հողին, սսկայն նման միջոցառումները նոր ոգևորություն և ուժ են հաղորդում տեղաբնակներին՝ սեփական հողում ապրելու և արարելու համար։
Կարդացեք նաև
Հավելենք, որ հայտնի Խորանաշատը հիմնել է Հովհաննես Վանական Վարդապետը Վահրամյան իշխանների աջակցությամբ՝ XIII դարի առաջին կեսին: Խորանաշատը միջնադարյան Հայաստանի ամենախոշոր կրթական, գիտամշակութային ու աստվածաբանական կենտրոններից մեկն էր:
Խորանաշատի վարդապետարանը եղել է պատմագրական թեքում ունեցող դպրոց, որտեղ ուսանել են 7-8 տարի։ Դասավանդել են պատմություն,աստվածաբանություն, իմաստասիրություն, մատենագիտություն, երաժշտագիտություն, քերականագիտություն, աստղաբաշխություն, տոմարագիտություն, բնագիտություն, բուսագիտություն, նաեւ ընդօրինակել ձեռագրեր։ Այստեղ ուսանել են հանրաճանաչ փիլիսոփա Վարդան Արեւելցին, պատմաբան Գրիգոր Ակներցին, կաթողիկոս Գրիգոր Ախթամարցին: Խորանաշատը եղել է նաեւ գրչության կենտրոն:
Այստեղ գրված անգին ձեռագրերից շատերը պահվում են Մատենադարանում, այդ թվում «Մատյան ողբերգության», «Նարեկ», «Մաշտոց» ձեռագրերը: Վանքում ստեղծվել է նաեւ Ավետարանի ձեռագիրը, որն ենթադրաբար գրվել է հնադարյան Արցախում, Ուտիքում:
Լիա ՃԱՂԱՐՅԱՆ
Լուսանկարները՝ Առավոտի
