Համաշխարհային տնտեսական հարաբերություններում առկա խառնաշփոթի պայմաններում ԵԱՏՄ շրջանակներում երկխոսությունը հատկապես կարևոր է, այս մասին հայտարարեց Հայաստանի վարչապետ Նիկոլ Փաշինյանն այսօր, ԵԱՏՄ միջկառավարական խորհրդի նեղ կազմով նիստի բացման ժամանակ։
Նիկոլ Փաշինյանը շեշտեց, որ համաշխարհային տնտեսությունը ոչ լավագույն ժամանակներ է ապրում, շատ առևտրատնտեսական, արդյունաբերական, լոգիստիկ կապեր, որոնք համավարակից հետո նոր են սկսել վերականգնվել, նոր ցնցումների են ենթարկվում: Այն դեպքում, երբ հարցի տակ են, այդ թվում, նաև հիմնարար գլոբալ տնտեսական համակարգերը՝ Նիկոլ Փաշինյանը կարևորեց Եվրասիական միության գործադիր մարմինների ամենօրյա աշխատանքը՝ ի հայտ եկած խնդիրներին արձագանքելու համար։
«Փոխադարձ շահերի ըմբռնումը, փոխզիջումների գնալու պատրաստակամությունը կարող են դառնալ բազմաթիվ հարցերի լուծման բանալին»,- ասաց վարչապետը։
ԵԱՏՄ նախագահող երկրի՝ Ղրղզստանի վարչապետ Ակիլբեկ Ժապարովը ևս ողջունեց ներկաներին, շնորհակալություն հայտնեց հայկական կողմին ջերմ ընդունելության համար, խորհրդի նիստին ցանկացավ արդյունավետ աշխատանք:
Կարդացեք նաև
Նշենք, որ հոկտեմբերի 20-21-ը Երևանում անցկացվում է Եվրասիական միջկառավարական խորհրդի նիստը, որի ընթացքում կքննարկվեն եվրասիական տարածքում ինտեգրացիոն գործընթացների զարգացմանը վերաբերող օրակարգային հարցեր:
Նիստին մասնակցելու համար Երևան են ժամանել ԵԱՏՄ անդամ երկրների վարչապետեր՝ Բելառուսի վարչապետ Ռոման Գոլովչենկոն, Ղազախստանի վարչապետ Ալիխան Սմաիլովը, Ղրղզստանի վարչապետ Ակիլբեկ Ժապարովին և Ռուսաստանի վարչապետ Միխայիլ Միշուստինը:
Լուսինե ՄԱՐԳԱՐՅԱՆ
